Dry State & Clean Election

– I.Zülu Pongen, Mongsenbai Ward, Mokokchung.

Tanü Langpangkong tzükong puri mapangshia kanga meranga clean election asoshi nokdakba ngua kanga temulung achir. Iba denji ABAM aser Aoli pastor fellowship ajanga züngkümshidi nükjidong nung ajemdaker sentong tajung jenti renema Aoli Arogotem ajak nung sarasadem ghonda lemsar yinzü metokdangi agia arudagi. Iba clean election atema terenemba onük nungji yi mamshitsü kimen balala oda youth kimen, tetsür kimen ano pawan kimen melapoktsü, nisan masongtsü, ano iba dak sendakba ozüng ajakji party aser candidate ajak asoshi tekümdangtsü tenokdangba agütsüogo. Ibai benshitet nungbo Candidate asoshia sen indoktsü lenmang onsarabo malitsü südi. Sen malemtsü, vote atema sen memeshitsü shisema lir. Party lenirtemi iba rules and regulation ji tashi anga nungbo mapa aika mali merarateptsü, tai memenatsü atema lir.
Saka parnoki mangara shibai aji nokdangtettsü, temzüng yangludangbo yi majemer arogo mungdang tenzükeri yangluji kanga shisa kaa temulung ulua yangluteter, saka teinyakertemi aji makoktsü. Tamasa mapa metenzükdangyongi yi bushia arur, kimen lapoka nisan mesongra teka alen ama aser aji kong sentepa mapa alemtsü ta tamasa bilema arur. Temeshipurtemi teinyaktsü agütsüogo, sürabang aji meinyaktetertem dang asenoki kechi agi merenshitsü. Temerenshi balala lateta makara ozüngji amajok. Ano item aibelenertem reprangtsü luden shima aka asü maka(?) khubo tululu atak, saka khu nung inoktsü makara khuji amajok.
Asenoki taoba indang bilema arudi, S.C Jamir Congress sorkar nung Chief Minister alidang ABAM nung Executive secretary Rev. Riküm liasü. Pai anir mongdang aser arogo tenzüker den CYE aser tamanger temulunger ajak Kohima nung adenshia lumia dry state akhang. Anungji Chief minister-i dry state lapoktsü, yamaji tanü tashi dry state nung lir. Asenoki Dry state akhang nungji aji nguogo, dry state tetezü takong lima/yimli ta ratettsü akok. Iba sülen linük nung saru mulok telok balala ajaki meshi, ano item nüngtem nung memetetba telok aser kijai sapisaru japang mayim aküm nung takartema pei gari/cycle mamshiteti aküm oset ajak parnok meyong aküm. Item ajaki yibo talubosa ajem, politician temia yi tajung ajak ajem, ajaki yi ang kibur kümdaktsü. Dry state asünungji senotsü agi timtema alima akongba dak alaka yibo ayong ama yimdaki.
Mongdang aser arogotemi yi nokdangba den yi ayoker atema follow up agütsü nungbo karbo ajangzüker lila ta bilemer. Aser Dry state yangluba sülenji sorkar den amalitepa yi ayoker tashi mangartemji kechi agi merenshitsü aji ozüng lateta lilasang karbosa azüokteter lila ta bilemer. Anungji dry state nung ya asenoki tamakok aludaktsüogo.
Yi ya joko mayoktsü aser majemtsü ta sür ABAM tetuyuba ajanga arogoi social concern committee tenteta yi ayoker ajak dangi oa atakatema sayutsüngia aruogo. Ano mapang mapang nung ya ajak indokja aruogo. Anungji Tsüngremi tashi mangartem yi ajemer aser tayoker tena karbo arishi leptoka tongogo, aika süiogo ano karbo yipten nung longdaka lir. Senbo kar sürnung taneptsü mangur. Teka mekanger sarasademjang ta Tsüngrem tanelai melaba ama teka mekanga sarasademtsü nung iba sülen parnoki dangi atakatem atalok.
Yamaji tamanger tajung aikati tan aruya aliba election maparen nunga asenoki nangzükba ama takok mangu nungbo Tsüngremi tashi mangaba taaji meküploktsütsübasa. Anungji asen Aortem iba Clean election ya koma aginer yamaji takok angutsüsa maibelentsü merangdi arungma. Aser party koba südir süaka clean election temzüngji mamai tazüokba nung inyakdaktsüner.
Tsüngremi asen memenendoktsüsa Khristan tajungtem sarasadem nung akhangdi aser koba party ajanga Khristan reshikangshir aser Khristan inyakyim nokdangtsüsa lir, iba partyji sentoktsü mepishir ta osang azünger ajak den lemsateper.