DT&A nung ketdangsertem den tepila sentong ayongzüka agi

Dimapur, December 16 (TYO) : December 16, 2015 nü Directorate of Treasuries & Accounts-i Principal Director Z. Mesen, Director L.N. Konyak aser Store Keeper Sofuru Tetseo nunger den tepila sentong agi.
Principal Director, Z. Mesen-i tepila o jembidang, Tsüngremi pa temang anema tokja pa mapa inyaktsü kümsük tembanga inyakdaktsüba atema tenüngsang agütsü.
December 21, 1980 nü Mesen-i Cooperation department nung Sr. Inspector ama inyaktsü tenzük aser iba sülen December 21, 1983 nü NPSC ajanga Department of Treasuries & Accounts nung Junior Accounts Officer inyaktsü tenzük.
Küm 25 tashi sorkar mapa inyaka arudang pa tesem terben melenshia inyakogo, ta tanü Mesen-i ashi.
Nübor tenzükba mapa inyaker sorkar mapa inyakertemji tia taka aser nisung kati tangatetba tajung nung nübor tenzüktsüla, ta paisa ayongzük.
Pa inyaka arudang sorkari teyari balala agütsüba atema paisa pelaba metetdaktsü aser department nung tang teinyakdak ketdangser aser staff-i amalitepa mapa inyaktsü ayongzük.
Tang department asoshi Pension Scheme, Department nung computerization aser Science & Technology dak sendakba teinyaktsütem lir anungji nisung ajaki item mapa nung yaritepa inyaktsüla, ta Mesen-isa department nung inyakertem ayongzük.
Director, L.N. Konyak-ia pa kümsük tembanga inyaktsü atema Tsüngrem nem tenüngsang agütsü aser Department-i mapa nungi anisüngzükertem asoshi sentong tajung ayongzüka agiba atema pelaba metetdaktsü.
Tanü agiba sentong nung Treasuries & Accounts Parliamentary Secretary, Dr. T.M. Lotha-i o jembidang, mapa nungi anisüngzüker ketdangsertemi kanga dang nendaka aser bendanga agüja inyakogo ta ashi.
Sentong nungsa ASOTN President, ASAN, NF&ASA, Directorate Ministerial staff nungeri o jembi aser Director & Incoming Principal Director, K. Tiayanger Tzudir-i Department tenüng nung tepila o jembi.
Sentong nung mendenji Additional Director, Zhekheto Zhimomi liasü, Additional Director, Zübemo Odyuo-i anküp tepela o jembi aser Joint Director, Vahine Thisa-i tenüngsang agüja sarasadem.