DU-i Modi nem BA Degree agütsüba kuli mali: AAP

New Delhi, May 07 (Agencies): Tanü AAP-i, Delhi University (DU)-i 1975 küm nungi 1980 küm tashi parnok record bushiogo, ajisüaka parnoki Ato kilonser, Narendra Modi nem BA degree agütsüba kuli mengutet, ta ashi.
AAP-isa, Alwar nung alir nisung ka tenüng agi Narendra Kumar Mahavir Prasad Modi nem degree agütsü, ajisüaka Narendra Damodardas Modi nem magütsü, ta ashi.
“Onoki onok sasep nung Delhi University records 1975 küm nungi 1980 küm tashi bushi aser degree agüja alir rongnung Narendra Damodardas Modi tenüng mali,” ta AAP lenir, Ashish Khetan-i ashi.
“1975 nungi 1978 tashi nung nisung ka graduate asüba lir, saka paji Narendra Kumar Mahavir Prasad Modi lir. Pa Alwar, Rajasthan nung alir aser  tasoba anogoji October 19, 1958 nü lir,” ta paisa ashi.
Osangkaket ka nung Narendra Modi indang degree osang tetshia Khetan-i, iba osangji Delhi University nungi anguba osang denji mapeter, ta ashi.
“Onoki bushisüngdangba ajanga iba degree ji (Modi indang degree) taila ta bushitet. Iba ya ozüng alema inyakba aibelen tulu ka lir, iba ya taila lir,” ta AAP leniri aitsü.
Khetan-isa, taoba APP minister, Jitendra Singh Tomar nem temerenshi agütsüba ama Modi nema kasa temerenshi agütsütsüla, ta ashi.
AAP sorkar nung Tomar ya Law Minister liasü, ajisüaka taila degree amshiba ken o nung pa menden nungi anendaktsüba den külemi police-i apu.
“Police-i pa (Modi) Delhi University-i anir aotsüla aser pa tatidang agütsüba takdangi  anir aotsüla. Ozüng matsüngdang nisung ajak kasa. Tomar dang benshiba ama kasaji benshitsüla,” ta Khetan-i ashi.
2014 Lok Sabha election affidavit nung Ato kilonser Modi-i pa Delhi University  nungi BA degree anguba indang shia lir.