Dubai nung WWE atema nisung bushitsü

New Delhi, April 25 (Agencies) : World Wrestling Entertainment (WWE)-i Dubai semdangtsü aser anogo pezünü, April 26 nungi 29, 2017 tashi munga parnoki tarutsü mapang asoshi WWE Superstars bushiba mapang agitsü, ta Mongulbarnü parnok sangdong ka ajanga metetdaktsü.
Iba sentong ya tan tasen yangluba Dubai Opera House nung ayonga akatsü aser yangji Middle East aser India nungi wrestling nung sempet aketertem, tetsür aser tebur nisung 40 nem maongka agüja shimoker WWE Performance Center, US nung training agütsütsü, ta WWE sangdong nungji shia lir.
Iba tetoktepba nung saisapong tapu balala asayartem ajaki shilem agitsü.
Dubai nung iba sentong ayonga akaba ajanga WWE-i alima rangben nung sempet alirtem nem maongka agütsüba jungkai adoka sayur. WWE-i tawa tanü Europe nungi rugby aser football asayartem, India nungi Kabaddi asayartem aser melangtepertem aser China nungi martial arts asayartem aser tsüngtepertem rongnungi sempet alirtem bushia liasü.