DUCCF-i Naga Yimten Teloktem atema saru mesarutsü

Dimapur, May 30 (TYO) : Dimapur Urban Councils Chairmen Federation (DUCCF)-i Naga National Movement akhümtsübur aser maneni Naga linük yangerba mapa nung yariteptsü, saka Naga National Movement lemsar ali tashibo Naga nunger taginüba aser pungmangtem kodang mataloktsü ta Naga nungertemi rajema angatetogo. Iba tangatetba nung October 31, 2013 nü public-i ‘Sorkar Ka, Saru Ka’ indang telemtetba agi, ta Media Cell, DUCCF sangdong ka nung metetdaktsü.
October 31, 2013 Public Rally nung ACAUT lenisüba kübok telemtetba agiba nung ajemdaker DUCCF-i ‘Sorkar Ka, Saru Ka’ tangatetba nung Naga Yimten Telok shinga atema saru mesarutsü bangzünga renem, ta sangdong nung shia lir.
“Public tenzüktsü atema Colony Council balala tenteta lir aser Naga nunger taginüba anema Colony Council temi mapa inyaktsü makok. Public-i ‘Sorkar Ka, Saru Ka’ asütsü bangjemba aser Naga Yimten Telok shinga nema saru magütsütsü lemteta lir süra, kodaser Council züngsemtemi Naga Yimten Teloktem atema saru sarutettsü?” ta DUCCF-isa metetdaktsü.
“Anungji, DUCCF-i Naga Yimtem Telok ajak dang colony tem nem saru meshiba shidi magütsütsü aser Chairman o GB tem dang parnok tenüng nung saru sarutsü atema mekangshitsü ayongzüker. DUCCF-i ACAUT Nagaland Movement pusema nungitba nung masetshi noktaka lir,” ta Media Cell, DUCCF sangdong nungsa shia lir.