DUDA-i Longleng District nung Health Camp ka katsü

Dimapur, March 24 (TYO) : March 22, 2016 nü Longleng District kübok Tamlu Primary Health Centre nung Department of Underdeveloped Areas (DUDA)-i Health Camp ka katsüogo aser iba sentong ya Tamlu Town, Tamlu Village, Bura Namsang, Kangching aser Netnyu yimtsüngtem amsema agi, ta DUDA-i sangdong ka ajanga metetdaktsü.
Iba sentong nung angati arua yarir doctor tem tenüng yamai:-
1. Dr. Watsutho Nyuthe, Sr. Specialist, NHAK
2. Dr. Bernard Amer, Sr. Specialist, NHAK
3. Dr. Phyansythung Patton, Sr. Specialist, IMDH, Mokokchung
4. Dr. Zimatho Nyusou, ENT Specialist, NHAK
5. Dr. S. Manyau Phom, SMO, Medziphema aser
6. Dr. Imnameren Phom, Sr. Specialist , DH Longleng.
Iba camp nung operation agitsüsa timtem keta alir parnok nisung 437 tenüng zülua liasü. ENT atema nisung 47 tenüng zülu aser parnok rongnung nisung 18 nembo ‘hearing aids’ lema agütsüogo. Eye OPD atema arur parnok nisung 69, General Medicine atema nisung 191 aser Obst & Gynae atema parnok nisung 44 aru, ta kasa sagdong ajanga metetdaktsü.
Iba Medical Camp den külemi parnok inyakyim dak keta aliba ama Eleutheros Christian Society (ECS) telok den tesentaktep nung DUDA-i “holistic and integrated project” ka dena lapoktsü. Iba project ji Commissioner & Secretary, DUDA, L. Kire, IFS-i lapoktsü.
Iba project ajanga Mon, Tuensang, Longleng aser Kiphire district tem nung temang anema aliyim, kaketshisatsü, merükmeju aser libaliro tsütsü rangloker inyaktsü.
Project lapoktsüba mapang L. Kire-i, backward tesem nung alirtem nem terenlok bener arutsütsüji DUDA teinyaktsü lir aser nükjidong nung aliba ama Eastern Nagaland nung aliba district tem nung DUDA tsüngnep ngudar, ta ashi.
Paisa, iba den külemi ‘human resource development’ tsütsü khen reprangshima item tesem nung aliba nüburtem libaliro nung terenlok tali bentsür arutsü asoshi ano teinyaktsü jenti anendaka lir aser iba nükjidong tulu yur ECS den lokteper iba project ya tenzüker. Anungji nüburtemia ibaji angateta kechi asenok ket nung lir iba jagi ajak peria tajangzük angutsüsa amalitepa inyakdi, ta ashi.
L. Kire-i ECS nung Rev. Dr. Chingmak Chang tenüngsanga ashiba mapang, DUDA-i ECS den külem sür inyaktsü shimtetbaji kechiba süra parnok dak tesem ajaklen terenlok bener arutsü nükjidong tajung lir aser lokti ajak tebilemtsütem sorkar den tongtepratepa inyakba ajanga nüburtem tejakleni anir otettsü, ta ashi.
Iba sentong nung District Administration nungi ADC Tamlu, Shayung Phom-i anir yim pongu nungi Council Member tem, ENSF Tir aser Village Health Committee tem dena liasü.