DUDA-i zünger mapa mangur nem kisüjensütsü tesayuba agütsü

Tsiepama, September 3 (TYO) : Mapa mongui aliba lanurtem kisüjensü mapa angazüka inyakdaktsütsü nükjidong nung District Urban Development Agency (DUDA)-i taoba mapang Mid way Resort, Tsiepama ta ajaba Eco village nung training ka ayongzüka agiogo.
DUDA-i Under Developed Areas Programme (UDAP) nung skill up gradation training ayongzük aser iba ya Eastern Nagaland nungi lanurtem atema agi.
Iba training nung adenertem ajak Nagaland nungi builders aser construction firms nungertem agiogo aser karbo kobi melii Bamboo construction centre nung inyaktsü ta Dr. Anungla Phom, Joint Director DUDA-i tanü metetdaktsü.
Training nung adenertem nem construction tools agütsü aser Labour department kübok skilled labour ta züluokogo. Taküm kümsa department-i Eastern Nagaland nungi lanur 540 nem training agütsütsü sentong lir, ta Anungla Phom-isa ashi.
India sorkar kübok Zynorique Initiatives ya vocational training providers (VTP) nung züluoka lir aser lanur 3000 den timba training agütsügo, ta tanü Richard Belho-isa ashi.
Mid Way resort ya mezüngbo Tourism department kübok liasü aser tang Zynorique Initiatives nem küm 10 atema agüja lir. Kobi melii iba ya Eco village ka akümtsü aser zünger mapa mongui aliba lanurtem nem training tapu balala agütsütsü.
Tanü sentong nungsa Commisssioner & Secretary, DUDA L Kire-i o jembidang, training nung adenertemi inyaktetba ngua kanga süngmangba ashi.
Iba ya mapang ka atema dang masü saka taküm piyong pei tepok mesüa litettsü. Iba training nung adenertemi jenjang tajung ka tongogo aser iba ya taküm piyong atema kuli asütsü, ta L Kire-isa training nung adenertem ayongzük.
Zünger mapa mangurtem asoshi skill upgradation training ayongzüka agiba atema Kire-isa Dr. Anungla Phom nem tenüngsang agütsü.