Dung-i Vietnam Ato Kilonser menden toktsüogo

Hanoi, April 06 (Agencies): Vietnam madak küm 10 tashi yimsü asüba sülen Nguyen Tan Dung-i Vietnam Ato Kilonser menden tanü, Bodbar nü toktsüogo.
Vietnam madak yimsüsütsü tashi benokba Communist Party (CP)-i Vietnam yimtiba, Hanoi nung taküm January ita agiba Congress senden nung National Assembly yimsüsür 462 nungi parnok 430-i par vote agüja Dung Ato Kilonser menden nungi anentsütsü lemteta liasü.
Kasa senden nung Dung melenzüka Vietnam Ato Kilonser tasenba kümdaktsütsü asoshi yimsüsürtemi Nguyen Xuan Phuc shim aser Nguyen-i Ato Kilonser tasenba akümtsü tenangzükba asüng, Brehostibar nü agitsü.
Vietnam Ato Kilonser menden abener rong nung Dung ya yimsüsür tajungtiba aliba osang jangjaogo.
Ajisüaka, Vietnam Shipbuilding Industry Group aser Vietnam Shipping Lines na densema, pa lenisüba kübok tenzükba tongti mapatong aika tamakok ajurua par sorkar nem sentsü atsütsüba yong Dung ya CP General Secretary menden nungi anentsüba den külemi, pai Ato Kilonser mendena maneni mebentettsüsa jenjang tamajung ajuru.
Alimar rongsenren jenjang mejungi akümba mapang ka nung Dung-i 2006 küm Vietnam Ato Kilonser menen benok aser pa lenisüba kübok Vietnam linüki rongsenren terenlok jenti ngua liasü.