DUP teyari agia sorkar akümtsü: Theresa May

London, June 9 (TYO): Democratic Unionist party teyari agia sorkar akümtsü ta Britain nung Conservative Party lennir Theresa May-i tanü metetdaktsü.
Tanü May-i Buckingham Palace semdangba sülen osangbener den sensaksemdang, lar teloki menden 8 agi ‘majority’ mengutetaka, sorkar akümtsü atema temeten lir, ta ashi.
Ajisüaka, külen Labour party-ia parnoki ang chichiba takokji angu ta metetdaktsüogo.
Theresa May-i sorkar kümteta ketdangsüa aotsü atema aaka bilemtsüla, ta parnokisa ashi.
Parliament nung Conservative Party-i menden 326 nung takok angu nungdang ‘majority’ angutsü, saka menden 650 nungi 649 result adokba nung, parnoki 8 agi ‘majority’ mangu. Iba jagi parnoki DUP teyari agi nungdang sorkar kümteta otettsü.
Elections sülen cabinet reshuffle nung cabinet minister pungubo mapa memelenshitsü ta osang angazüker. Parnok punguji, Defence Secretary Sir Michael Fallon; Brexit Secretary David Davis; Home Secretary Amber Rudd; Chancellor Philip Hammond aser Foreign Secretary Boris Johnson nungertem lir.
Britain Chubatsür den ajurutepa minute 25 senden amenba sülen, Downing Street nung May-i osangbenertem dang, DUP medemertem den külemi lai Brexit atema inyaktsü.
“Iba ama tensa tongtipang ka nung onoki sorkar tajung ka kümtettsü aser Britain len anitsü” ta laisa ashi.
“DUP den tesentaktep tajung lir aser sorkar tasenba jagi anogo 10 dang lir tenzüktsü aliba Brexit olemtep nung linük len anir aotsü. Küm aika onok telok ana tesentaktep tajung nungdang arur aser onok külemi sür United Kingdom ajunga atema inyaktettsü ta amanger” ta laisa shisem.
“Ni takok tajung ngunüa liasü saka iba amaji matalok. Elections nung tamakok anguba candidate tema atema ni sasa bilemer. Asen linük asoshi bendanga agüja mapa tajung inyakba MPs aser ministers, shirnok pei pei menden nung tamakok nguogo, nenok tamakok atema ni kanga sasar” ta May-isa metetdaktsü.
Külen, DUP lennir Arlene Foster-ia osangbener dang, lai Theresa May den ajurutepa jembiogo aser linük asoshi mapa inyaka aotsü atema tebilembatem lemsatepogo, ta ashi.
DUP-i Northern Ireland aser idakji aliba nisungtem taginüba atema inyaker saka kasa mapang nung onoki UK atema tajungtiba bilema inyaker, ta Arlene Foster-isa metetdaktsü.