Durga Thakur International Hockey Umpire akümer

New Delhi, April 19 (Agencies): Alima ajunga nung hockey asayatsüren ketdang asür, International Hockey Federation (FIH)-i India tsür, Durga Thakur International Hockey Umpire kümdakja la temaba jenjang nung ajungkettsüogo.
Tawa New Zealand kübok Hastings nung ayonga agiba Hawke’s Bay Cup hockey asayamong nung Umpire ama kanga junga shilem agiba ajiteta FIH-i Durga international jenjang nung umpire inyaktsü maongka agütsü.
Durga-i India kübok Bhopal nung 2013 küm ayongba 3 buba Hockey India (HI) Sub-Junior Men & Women National Championship (Finals) asayamong nungi tenzüka umpire inyakba osang bushitetogo.
2011 küm NSNIS nungi graduate asüla, Durga-i Netherlands kübok Breda nung 2015 ayongba double six-Nation Cup asayamong nung umpire inyaktsü maongka ngua international jenjang nung mezüngsüa umpire inyaka liasü.
New Delhi nung tentetba Modern School nung physical education tesayur inyakla, Durga-i lar Himachal Pradesh tenüng nung National Championships asayamong nunga handball, basketball aser hockey shilem nung shilem agiba osanga jangjaogo.
Tebur 10 aser tetsür 5 densema, International jenjang nung umpire inyaktsü jenjang angur India nunger 15 rong nung Durga-a densemer lir.
“Durga-i international jenjang nung umpire inyaktsü jenjang ngua, India nem konang tulu bener arutsüba atema la nem tenüngsang agütsür,” ta Hockey India (HI) nung Secretary General, Mohd. Mushtaque Ahmad-ia metetdaktsüogo.