Dutee Chand-i Rio Olympics 100m nung tokteptsü

Almaty, June 25 (Agencies): Kazakhstan kübok Almaty nung ayongba 26 buba G Kosanov Memorial Meet nung India tsür, Dutee Chand-i takok ngua shilem agiba sülen 2016 Rio Olympics nung shilem agitsü temten tanü, Honibar nü nguogo.
Arishi küm 20 tain Dutee-i mapang 11.30 seconds nung tetsür 100m alizüng tonga Olympics nung shilem agitsü temetenji angu.
Rio Olympics nung shilem agitsü temeten angutsü asoshi toktepa asemer kati tajemba agi mapang 11.32 seconds nung alizüng atongtsü latetja lir.
Odhisha tsür, Dutee-i tanü mapang 11.30 seconds nung alizüng atongba sülen lai alizüng mapang 11.33 secs nung tonga taküm April ita Federation Cup National Champions asayadang yangluba national otsü ajangteta liasü.
Lai tanü temeten anguba sülen la Rio Olympics nung shilem agitsü temeten angur India’er track & field athlete 20 buba akümer lir.
Ano külen, Olympics nung shilem agitsü temeten agütsütsü asoshi tetendangba agitsü tenzükba sülen Dutee ya 100m tetoktepba nung shilem agitsü temeten angur mezüngbuba India’er tetsür toktepa asemer kümogo.
Külem senotsür, P T Usha-ia 1980 Moscow Olympic Games 100m tetoktepba nung shilem agia liasü saka iba mapangbo Olympics atema tetendangbaren magi liasü.