Dutee-i tetsür 60m National otsü tasen ka yanglur

Doha, February 19 (Agencies): India’er tetsür toktepa asemer, Dutee Chand-i 7 buba Asian Indoor Athletics Championships tetsür 60m dash heats finals nung shilem agitsü tetoktepba nung mezüngbuba jenjang ngua national record tasen ka tanü, Hokolbar nü yangluogo.
Dutee-i tanü mapang 7.28 secs nung alizüng mezüng tonga tekaratiba mapang nung 60m alizüng atonger mezüngbuba India tsür akümba den külemi, lai Asian Indoor Athletics Championships otsüa tasen yangluogo.
Vietnam kübok Hanoi nung 2009 küm ayongba Asian Indoor Games nung India tsür, Arjina Khatun-i mapang 7.81 secs nung alizüng tonga tetsür 60m alizüng tekaratiba mapang nung atonger asayar akümba otsü yanglua liasü.
China kübok Hangzhou nung ayongba 2012 Asian Indoor Championships nung Kazakhstan tsür, Viktoriya Zyabkina-i mapang 7.33 secs nung alizüng tonga yangluba tekaratiba mapang nung 60m alizüng atongba otsüa Dutee-i tanü ajangtetogo.
Ajisüaka, Sri Lanka tsür, Susanthika Jayasinghe-i mapang 7.09 secs nung 60m alizüng tonga 1999 küm yangluba Asian Indoor record-bo tanü tashi nung shingaia ajangteta mali.