Duterte-i Obama aitsür; Russia & China dang nungi teyari meshitsü amokmerener

October 4, 2016 nü Philippines kübok Makati city nung Philippine President Rodrigo Duterte (abelen nungi tasembuba)-i Israeli Ambassador to the Philippines Effie Ben Matityau (abelen nungi tanabuba) aser Jewish Association of the Philippines züngsemtem den teka amteper agiba noksa ka angur.

Manila, October 4 (Agencies) : Mongulbarnü Philippine President, Rodrigo Duterte-i U.S. President Barack Obama dang molumi-i oang ta ashi.
“United States-i Philippines dang prangpong-injang ayoktsü memulunger saka iba atema ni hao ta mali, kechiyong Russia aser China nati ayoktsü mulunga lir” ta Duterte-i ashi.
Duterte-isa ashiba agi, pai United States akhüm metsübur aser pai ozüng alema amshiba mozü anema rara aitsürtem dang suwartem ta aja.
Mozü anema rara tenzüker ita asem tsüngda nung nisung 3,400 den tema tepsetogo aser iba mapa atema pa aitsürtem dang Duterte-i suwar ta aja.
“United States-i missiles aser tanga prangpong-injangtem ayoktsü memulunger saka Russia aser China nati ayoktsü mulunga lir. Nenokibo manganütsü akok, saka iba linük tashi itta ayutsü aser nübortem junga ayutsübaji kü indang teinyaktsü lir” ta paisa shisem.
“Nenoki kü dang prangpong-injang meyonür süra, ni Russia dangi aotsü. Ni kü gerenal tem Russia-i yok aser parnoki onok dang ‘nenok shisa tebulu, onok ket ajak peria lir aser itemji nenok nem agütsütsü’ ta ashi” ta Philippines Tir-isa metetdaktsü.
“China-ia onok dang arur sign dang süang aser ajak agütsütsü ta shiogo” ta paisa shisem.
Russia aser China dang United States indang onük lemsatepba sülen linük ana jagi pa pusema nungitba metetdaktsüogo, ta Duterte-i Deobarnü metetdaktsü. Paisa ashiba agi, pai U.S.-Philippines Enhanced Defence Cooperation Agreement ken meyipa reprangshitsü.
Iba tenangzüktep ya 2014 küm agi aser iba ajanga US sepaitemi Philippine base tem telungi aitsü aser maritime security, humanitarian & disaster response atema osettsüsettem yutettsü temelaba agütsür.
Shitakba agibo Philippines-i mozü anema raraba maparen nung United States-ia pusema nungittsü melena nisung aika asüba atema ang parnoki aitsür, ta Duterte-isa ashi.
“Onok yaritsü melena, State Department aitsü. Anungji, Obama na molumi-i oang” ta pai shisem.
US ketdangser kari ashiba agi, Duterte-i jembiba onüktem Washington-i süoki ia mebilemi dang toktsür.
US-i Philippines den tesentaktep meraksanür kechiyong China-i Philippines den tesentaktep tajungba kümdar. Ajisüaka, US-i Philippines nem aid agütsüba sota ayutsü atema olemtepdar, ta US ketdangserisa metetdaktsü.
Duterte den tongti süa yariteper kari Hombarnü pa dang yimten lennir tajung ka ama alitsüla kechiyong pai o jembiba nung ashishiteper ta pa dang metetdaktsüogo.
Mongulbarnü Duterte-i ashiba agi, pai mozü anema raraba atema nisungtemi pa aitsür. “Kodang na aitsür aika lidir, parnok mezüngmeshiba ajanga dang na tugutettsü” ta pai metetdaktsü.
Mongulbarnü Philippine Tir, Rodrigo Duterte-isa Manila nung synagogue ka semdanga Yihuda nunger atishia jembiba olen atema tatok meshi.
Taoba hopta tu Duterte-i mozü anema inyakba mapaji Hitler aser Holocaust den medemdanga jembi aser iba yagi Yihuda nungertem temulung yirutsü.
Deobarnü Duterte-i alima nung Yihuda nunger ajak dang taok meshir ta metetdaktsü saka pai tanü Makati city nung aliba Beit Yaacov synagogue semdanga sasa bilemba olen lemsatep.
“Ni kü temulung taroktiba nungi tatok meshir” ta Duterte-i tanü Jewish Association of the Philippines dang ashi.