Duterte-i Philippine Tir inyaktsü tenangzükba agiogo

Taoba Davao yimti Mayor, arishi küm 71 tain Rodrigo Duterte (Achijilen)-i pa teka abelen Laishiba nung ayuba sülen pa teka achijilen anünglen metongokja Philippine Tir tasenba akümtsü tenangzükba Manila yimtiba nung tentetba Malacanang presidential palace kübok Rizal Ceremonial Hall kilung nung agidang agiba noksa ka yangi angur. (Manila, June 30)

Manila, June 30 (Agencies): Rodrigo Duterte-i Philippine linük Tir tasenba inyaktsü tenangzükba agiba sülen pa 16 buba Philippine Tir tanü, Brehostibar nü kümogo.
Philippine yimtiba, Manila kübok Malacanang presidential palace kilung nung Supreme Court Associate Justice, Bienvenido Reyes-i taoba May ita election nung takok angusang, Duterte nem Tir inyaktsü tenangzükbaji agütsü.
Tanü sentong nung Duterte’er tanurtem, Paolo, Sara, Sebastian aser Veronica nungera densema liasü.
Taoba Davao yimti Mayor, arishi küm 71 tain Duterte-i vote 16,601,997 tashi ngua, pa den tokteper, Manuel Roxas den vote million 7 shi agi vote timba ngua taoba May ita 9 nü Tir election koka Philippine Tir tasenba akümtsü jenjang angu.
“Philippine sorkar tasenbai Philippine ajunga nung temelenshi tajung bener arutsütsü nangzüker. Asen taküm nung temelenshi agitsü tenzükba ajanga dang asen alidaka temelenshi tajung bener arutsütettsü. Anungji, asenoki asensasa asen tajungba küma melenshitsü temulungtetba ayutsüla,” ta Duterte-i Tir inyaktsü tenangzükba agia Tir tasenba akümba sülen Tir ka ama mezüngsüa onük jembibdang metetdaktsü.
Pai aniba Philippine sorkar tasenbai ozüng alema mozümora shibelena ayokba aser ochimashi inyakba densema, ozüng alema inyakba maparen ajunga anema raratsü tenangzükba olen ka Duterte-i sangoktsü.
“Sorkar lenir aser yimsüsürtemi ochimashi inyakba ajanga sorkar senpong azüngtetdaktsür. Ano, ozüng alema mozümora shibelena kasaji yokshiba ajanga tesendaktep mejungi kümdaktsüba den külemi, kibong nunga rara adokdaktsür. Anungji, Philippine sorkar tasenbai ozüng alema inyakba maparen ajunga anema takok ngua raratsü nangzüker,” ta pai shisem.
Ano külen, Duterte-i Philippine Tir menden abentsü tenangzükba agiba jakdang Maria Leonor Robredo-ia Philippine Tatong Tir menden abentsü tenangzükba Quezon yimti nung tanü agiba osang jangjaogo.
Philippine Tatong Tir tasenba akümtsü tenangzükba agiba sülen arishi küm 52 tain Robredo-ia lar linük ajunga lungjema alitsü tayongzükba olen ka metetdaktsüba den külemi, Philippines nübur rong nung terenlok lidaktsütsü tenangzüka  lemsatepa liasü.
Linük temzüngi latettsüba ama, Duterte aser Robredo nati Philippines lenisütsü mendenji taruba küm 6 tashi abentsü.