February 20, 2016 : Kevin Hart o Rock na mapang kobi meli-i ano tanaben külemi inyaktsü mapangi bentsür aruogo.
“Central Intelligence” film nung külemi shilem agisang ana, Dwayne Johnson aser Kevin Hart nati taküm MTV Movie Award ketdang asütsü.
25buba MTV Movie Award ya takümbo Burbank nung Warner Bros. Studios telung nung masü saka tanga tesem nung oa April 9 nü tangoktsü aser April 10 nikongdang Eastern aser Pacific mapang 8:00 ako nungi TV nung yoktsü.
MTV-i iba sentong tesem tanga nung oa tangokbaji tan ya mezüng asütsü, ta network sangdong ka ajanga ashi.
“‘MTV Movie Awards’ nung meteta alir ka den külemi ketdang asütsü maongka anguba asoshi pelar,” ta Johnson-i ashi. “Onok ya onok sapurtem asoshi alir aser iba sentong ya parnok asoshi mamatetba aonung ka südaktsütsü nangzüker,” ta pai shisem.
“Ni sentong ketdang asütsü meimer-ibai ni jangraba mapa ka lir,” ta Hart-i ashi.
“Dwayne kena iba mapa asoshi tetemsü asütsü,” ta pai shisem.
“Trainwreck” film nung shilem agila Amy Schumer-i iba sentong küm asem tashi atonga atonga ketdangsüogo.
Taoba mapang wrestler aser comedian-i iba sentong takok angutsü asoshi koma ka anidaktsüner-ar iba nung tebilembatem nüburtem dangi nungi sarudar, ta Hokolbarnü MTV-i ashi.
25buba MTV Movie Awards atema tenüng benoka alirtem, shilem agirtem aser sempet agütsürtem tenüng khen lirang metetdaktsütsü.

You must be logged in to post a comment Login