Dy. Chief Minister-i anir asür Rev. Lhousuohie Mhasi mang ayimer

Dimapur, Rongchii/April 15 (TYO): Taoba mapang MLA inyaka alisang, Rev. Lhousuohie Mhasi, Kohima nung April 15, 2020 nü asüba osang angashia sasar, ta Dy. Chief Minister aser Nagaland BJP lenir, Y. Patton-i sangdong ka ajanga lemsatep.
Rev. Mhasi ya tanüla tsütsü lenir aser nüburtem asoshi inyaker ka liasü, shibai Naga nunger ajak ajangzüktsü asoshi inyakba asadangtsü makok. Pa ya osangkaket balala nunga pai bilemba lemsatepa liasü, shibai tetsübu kecha melie zülu. Ex-legislator rongnung tambusang ka asünung, pa asüba ya state atema shisatsü aser tajangshibatem tsütsü takoksa tuluka lir, ta Y. Patton-i ashi.
Tang mangyimba mapang kü den state BJP legislator temi asür nem akhum tetushi agütsür aser pa tanüla tesunep nung anisüngzükjang ta sarasademtsür. Maneni mangyimer kibong den asükhu lemsateper, ta paisa sangdong ajanga ashi.
Reverend Lhousuohie Mhasie ajungben asüba osang angazüka National Socialist Council of Nagalim (NSCN) aoksar, ta NSCN/GPRN sangdong ka ajanga metetdaktsü.
Rev. L. Mhasie ya tamangba yimsü tsütsü ajaki akhumtsübua aliba nisung ka liasü, shibai yimtenren inyakyim kanga junga meteter liasü.
Pai teintet nisung ka ama shisatsü agütsüba, sarasademba aser Naga nunger asoshi aria bilema inyakba ya melentsü tamakoktsü aser pa asüba asoshi NSCN-i khukhua mang ayimer.
Pa mapang talangka tim atemba aser Naga nunger asoshi bendanga agüja inyakba naga nunger yimten puti otsü nung züluoka ayutsü, ta sangdong ajanga ashi.
Pai tamendak dak tajung nung Naga political movement atema bilemba ajaki kanga junga meteta lir. Pai Indo-Naga yimten ken o jembishinüba indang asadangba ajanga pai Naga nunger yimtem tebilemtsü ajaki akhumtsübua aser agizüktettsüsa renemtsü asoshi angatetba sayur. Pa dak linük meimba tanüla onoki jungjunga ajitetogo. Naga nunger asoshi pa kechi liasü, iba atma onoki akhum agütsür, ta sangdong ajanga ashi.
Iba ama mangyim tejashi nung alidang kinunger nem tashi aser tasütait molungsentsü agüjang ta sarasademtsür. Rev. L. Mhasie tanüla tatem maka tesunep nung anisüngzükjangma, ta kasa sangdong ajangasa ashi.