Dy. CM. Y. Patton-i Mon semdang

Dimapur, Luroi/August 14 (TYO): Deputy Chief Minister Home & Border Affairs, Yanthungo Patton-i August 14 nü Mon jila nung anentsüh agi kongshir aliba Defence Colony, Thamnan Ward aser Techa Ward semdangogo.

Pa meina Advisor Sethrongkiu Sangtam, MLA Naiba Konyak, MLA Limaonen Chang, MLA Manpon Konyak, ADGP Renchamo Kikon, IGP V.Z Angami nunger oa liasü.

Mon DC Conference Hall nung senden tatsüka amenba mapang Patton-i ashiba agi, July 19 nü tatalokba ya kanga dang tia maka tatalokba ka aser parnok mapang tang mezüngbuba Nagaland nung iba amala lendong ya atalokogo.

Paisa, sorkari takokba tashi teyari agütsütsü aser Mon yanglushiba nongita yaritsü tenangzükba agüja liasü. Patton-i, kiojen aser lenmang amala raksar alibatem takaratiba nung yanglutsü atema Administration, Police, DDMA aser lokti tentet balalai kechi report sa agütsüdir aji state sorkari Centre sorkar dangi abentsü, ta ashi.

Social media nung mejangjaba osangtem prokshiba dak tamang makatsü asoshi nüburtem dang mepeshia pai, state sorkar aser Central team-i lendong atalokba tesem semdanga asadangogo aser takokba tashi teyari agütsütsü tenangzükba agütsüogo, ta ashi.

Minister-isa, SP-i anir District Administration, Police, SDRF Mon, KU, KNSK, KSU, volunteer tem densema rescue team ajak dang parnok mapa tajung asoshi kanga pelaba lemsatepogo.

Iba senden ya Deputy Commissioner Mon, Wennyei Konyak, NCS lenisüba nung amen aser pai lokti pela agizükba o jembia liasü. Paisa, Minister aser par team dang Mon semdangba atema kanga pelaba lemsatep aser July 19 anepdang tatalokba indang video tatsüka sayua liasü. DC-i ketdangsürtem dang parnoki teyari agüja Mon yanglushitsü temepishiba ka agüja liasü.