DY Patil stadium ajak dang tajungtiba:FIFA

March 25, 2017 : Honibarnü FIFA teloki Under-17 Football World Cup atema Navi Mumbai nung aliba D Y Patil stadium kanga junga renemer aliba ngua pelaba lemsatepogo.
FIFA telok ya Head of Events Jamie Yarza-i anir aru aser parnoki Honibarnü Nerul, Navi Mumbai nung aliba D Y Patil Stadium semdanga liasü.
“Ni yaküm iba stadium agi temulung asüba shiogo aser tanga ano kasaji ashir. Iba stadium ya kangsa tajung lir aser onoki iba tesem nung team pezü anendaktsütettsüsa renemtsü mepishiba ama mapa tuluba kalen temogo,” ta Yara-i iba stadium semdangba sülen osangbenertem dang ashi.
“Anungji iba stadium asoshi onoki kecha shisa mebulur, ajak taginüba ama asütsü. Tan yangluba dressing room temji kangasa junger. Ibai linük nung aliba stadium tajungtiba rongnung ka asütsü aser onok yagi kanga nema tanga arur,” ta pai ashi.
Pai, iba tesem nung mapa tila kar ang inyaktsü anünga lir, ta ashi.
LOC FIFA U-17 World Cup, Tournament Director Javier Ceppi-i, iba terenemshiba maparen ajak nung Prime Minister’s Office (PMO)-i tenüng yokdar aser Hombarnü shia terenlok osang agidar, ta ashi.
“Tang tashi nungbo linük nung stadium ajak rongnung ibai tajungba lir. Anungji anünga aliba stadium ajak iba ya mesüka junga yanglutsü atema onoki merangtsü. Ya kanga junger. Tanga stadium tem jia iba dang nungi tamajungbabo meyanglutsü,” ta Ceppi-i ashi.
D Y Patil Sports Academy nung Tir Vijay Patil-i, traning agiba tesema tajungba küma yangluogo, ta ashi.
“World Cup matong tashi nisung amenba tesem kanga junga yanglushitsü. Tang menden tasen bener arua lir,” ta pai ashi.