Dzieselatuo 10 buba International Hornbill Naga Wrestling champion akümer

Kohima kübok Kisama nung tentetba Amphitheatre nung 10 buba International Hornbill Naga Wrestling Championship 2016 champion, Dzieselatuo Kerütsu; takok angurtem; tongti nisungtem aser NWA ketdangsertemi agiba arok noksa ka yangi angur. (Kohima, December 07)

Kohima, December 07 (TYO): Kohima nunger Dzieselatuo Keretsu-i temaba jenjang ngua, 10 buba International Hornbill Naga Wrestling Championship – 2016 takokba tanü, Bodbar nü ajangzükogo.
Kohima kübok Naga Heritage Village Kisama nung agiba tetoktepba nung Tuophema nunger Keduovilie Zumvü-i tanabuba jenjang ngua liasü.
Dzieselatuo-i tan takok anguba sülen senpet sen 80,000 aser Keduovilie-i senpet sen 50,000 agizük.
Kasa tetoktepba semifinal asayatsü jenjang ajangzüker melangteper 2 prongla nem senpet sen 20,000 agütsü aser quarter o prequarterfinal nung shilem agitsü jenjang angur melangteper ajunga nem senpet sen 5000 aser 2000 agütsüba osang jangjaogo.
Nagaland sorkar kübok Tourism Department nungi teyari agia, Nagaland Wrestling Association (NWA)-i ayongba tetoktepba sentong nung President, Tenyimia Public Organisation, Timikha Koza tongti tesemdanger liasü.
Angami, Chakhesang aser Zeliang kin densema, Naga kin 3 nungi melangteper 35 tashi tan tetoktepba nung toktepa shilem agi aser parnok den densema, Maharashtra state kübok Mumbai yimti nungi raliwalir ka, Rahul Soma Sundar-ia tan tetoktepba nung shilem agiba osang angazükogo.
“Tenyimia kin sobaliba nung melangteptsü tetoktepba ya saisapongtsü shilem tejen rongnung densema lir. Iba tetoktepba ayonga agiba ajanga kin balala tsüngda telongjem aser tesendaktep tajung lidaktsür,” ta tongti tesemdanger-ia metetdaktsü.
Tan tetoktepba nung taoba Naga Open Wrestling& NWA champion, Kezhalelie Keretsu; taoba Hornbill International Wrestling champion, Surhoneyi Soho aser Hancheu Zeliang nunger tetendangertem liasü.