Dzieselatuo 2015 Hornbill Naga Wrestling Champion kümogo

Dimapur, December 04 (TYO): Naga nunger melangteper, Dzieselatuo Keretsu-i temaba jenjang ngua 9 buba International Hornbill Naga Wrestling Championship 2015 takok marok tanü Hokolbar nü agizükogo.
Nagaland Wrestling Association (NWA)-i Hornbill benjungmong den sentaktepba, iba tetoktepba ya 2007 küm nungi tenzüka kümshi Kohima kübok Kisama nung ayonga arur.
England nunger Graphic designer, Nick Voge aser Mechanical Engineer, Simon Jerrard na den külemi, Angami, Chakhesang aser Zeliang kin nungi melangteper 36-i tan asayamong nung toktepa shilem agia liasü.
Dzieselatuo-i 1 buba jenjang ngua senpet sen 60,000 agizük aser 2 buba, 3 buba aser 4 buba jenjang angur, Zasevikho Meyatsu, Seketukho Nipu aser Velato Veswuh nungeri senpet sen 40,000, 30,000 aser 20,000 agizük.
Tan asayamong quarterfinal nung shilem agir melangteper shia nema senpet sen 5000 agütsüba osang jangjaogo.
Nagaland School Education Minister, Yitachu-ia NWA nem tenla sen 10,000 agütsüba den külemi, quarterfinal nung shilem agir ajunga nem senpet sen 1000 agüja liasü.
Director, Tourism, Purakhu Angami, tongti nisungtem aser 2009 küm takok angur, Surhoneyi Soho aser 2012 o 2014 küm takok marok agizüker, Vechita Khesoh nungeri tanü tetoktepba repranga shilem agi.