Dzuleke nung Tourist Information Centre ka lapok

November 27, 2017 nü Dzuleke nung Dzuleke Tourist Information Centre lapokba sülen Tourism Parliamentary Secretary, C Apok Jamir den pa kinungtsü, NEIDA ketdangsertem aser village council züngsemtem külemi agiba noksa ka angur.

Dimapur, November 27 (TYO): November 27, 2017 nü Dzuleke nung Tourism Parliamentary Secretary, C Apok Jamir-i Tourist Information Centre lapoktsü.
Dzuleke yimtsüng nung ali rongsentem kümzüka ayutsü aser eco-tourism ajanga arem min wazüka ayutsü nükjidong nung Dzuleke eco-tourism mapa inyaker.
Iba mapatong nung shilem ka ama DETB-i homestay aser tanga tourist dak sendakba maparen inyaker. Iba mapatong ya North East Initiative Development Agency (NEIDA)-i Dzuleke village den külemi inyaker aser Tata Trust-ia pusema nungiter.
Tanü sentong nung o jembidang Parliamentary Secretary, C Apok Jamir-i “alima nung industry tulutibaji tourism lir aser iba industry kanga dang kara ainer. Anungji tourism renlokdaktsütsü atema tebilemtsü bena mapa inyaktsüla” ta ashi.
Tourism ji ajungkettsüla aser ibaji asü nungdang lokti aser rongsenkettsüng renloktsü aser alima kümzüka yutettsü, ta paisa ashi.
Dzuleke tourism board aser NEIDA nati alima kümzüka ayutsü indang osang prokshiba aser tebilemtsü bena inyakba atema C Apok-i pelaba shisem.
Nagaland nung aser talisa yimtsüng tia nung alirtemi pei tepok mesütsü atema industry tajung kaji tourism lir. Alima dang Nagaland indang tourism osang sangdongba nung media ajanga tongtipang shilem agitettsü, ta Parliamentary Secretary-isa shisem.
NEIDA nungi Sentimongla Kechuchar-i project indang osang metetdaktsüdang Dzuleke ya eco-tourism village ka kümdaktsütsü asoshi 2013 nungi Tata Trust teyari ajanga tenzük, ta ashi.
NEIDA ya Standing Operating Procedure (SOP) nung ajemdaker inyaker aser parnoki Thanamir aser Fakim nunga project tenzüktsü sentong lir, ta laisa shisem.
Dzuleke ajanga Nagaland kübok tangalena eco-tourism project tem amenteta aotsü lenmang sayutsü imlar, ta Sentimongla-isa metetdaktsü.
Sentong nung Dzuleke Eco-tourism Board (DETB), Avi Khate-i project indang osang lemsatepdang iba ajanga Dzuleke kanga ajangzükogo aser tourist tem teimba arur, ta ashi.
Tanü Parliamentary Secretary C Apok Jamir-i information centre lapoktsütsü aser yimertemi lapokba homestay ana semdang.
Sentong nung Dzuleke Baptist church pastor Letso Meyase-i temoatsü meshia sarasadem, DVC Vitsepielie Sophi-i tesentepertem pela agizük aser NEIDA Executive Director Dharani Ratno-i anküp tepela o jembi.
Kevisono Meyase-i homestay kibur ka ama ajangshia aruba osang lemsatep aser Dzuleke village choir ajanga ken ka aten.