E-cigarettes ajanga tanga moko achir ama yimya sübadaktsür

Washington, July 23 (Agencies): E-cigarettes nung keta aliba nicotine ajanga tanga moko achirtem ama yimya sübadaktsür aser meindoktsüsa akümer, ta bushisüngdang tasen ka ajanga ngutetogo.

Moko achirtem moko atoktsü nung yaritsü atema item E-cigarettes ya adok, ajisüaka e-cigarettes nung aliba tzü nung nicotine keta lir aser ibaji ajanga ka cancer adokdaktsür.

E-cigarette nung mokobo maronger saka iba nung aliba tzü nung keta aliba nicotine ji awangba ajanga tango kümdaktsür.

America nunger University, Beirut nung analytical chemistry nung professor, Najat Saliba-i ashiba agi, pa aser pa den külemi inyakertemi iba oset kanga junga tendangogo.

Parnoki ibaji tendangdang, e-cigarette nung keta aliba nicotine ajanga tamshirtemji lia liabo tanga moko achirtem ama yimya süba-a akümer. Ibaji dang masü saka iba ya ajanga moko machi alirtema moko chiba-a akümtsü mesüra tanga temesepba chiyungtsü achi tenzüktsü, ta putetogo.

Aji oda süaka e-cigarrette nung keta aliba nictone ajak agibo yamaji mekümdaktsür anungji ibaji ano jungjunga bushisüngdangtsü aser iba sülen jiang nicotine koba agi tanga moko achirtem ama yimya sübadaktsür’ar aji metettsü. Nicotine ya tapu asem lir aser item rongnung “free-base” nicotine ajanga iba ama yimya sübabaji adokdaktsü, ta scientist temi bilemer.