E.Roll asüngtetba mapang

Nagaland nung taoba küm trok tsüngda electoral roll nungi nisung tenüng lakh ana dak tema agienba osangji election maparen merüktetba nung takok anguba osang ka asütsü. Ano külen, nütsüng yongsük lakh metsü shi aliba state ka nung voter nisung tenüng tiyazü mesüra talila lakh ana dak tali züluoka aliba jagi asenoki ochimashi inyakba jenjang tuluka putetogo. Atangji, election ya nisung teimbai mulungba nung yimsüsür shimba mapa ka asünungji ajaki electoral roll nung nisung aika enokner, ajisüaka takok ngunüdang asenoki nisung tenüng talila electoral roll nung enokba jagi asenoki Tsüngrem tsüngdang aibelener aser tarutsü putu ashioktsür. Tamakok angutsüa akok saka alima nung kechi mapa nung südir süaka ochishia alibasa tajungba, kechiyong ochi agidang asenok nüchi kümdaktsütsü aser tanü tamakok angu agibo tarutsü putujibo ochishir meyong asütsü. Asenoki electoral roll nung vote aika aginüdang, census inyakdang nisung tenüng tiyazü aika enoker aser iba tiyazü census nung ajemdaker electoral roll tiyazü yanglur. Aji oda, census aser electoral roll tiyazü yanglua yur asenoki Tsüngrem dang lenir tajung meshia sarasademer. Ibaji temenünütsüka lir. Asenoki memeteti tai inyaksemba atema kecha mali saka metetsümonga tiyazü nung nütsüng yongsük aika kümdaktsüba aser electoral roll nung voter aika asütsü atema tiyazü tenüng aika enokbaji alima tsüngdang asenoki taaktsü mapa inyaka sayurba dang lir. Atangji, asenoki census aser electoral roll nung nisung tenüng tiyazü züluokbaji Tsüngrem aser nisung tsüngdang tai inyaker ta süoki ia bilema inyakba mapa ka masütsüa akok. Ibai takok ngunüdang taia tabo metet saka zübazübaa inyakba mapa ka asütsü. Ibaji mangatetba mapang nung inyak ama asenoki toktsüdi. Ajisüaka, tanübo tangatetba putu nung asenok alir asünungji, asenok ajaki electoral roll nung nisung tenüng tiyazü enoktsübajibo tebilema mebilemtsüla. Yashi tashi asenoki electoral roll nung tenüng tiyazü aika enoka yur sen amshia tashiyim agi yimsüsürtem shimogo. Iba temenen jagi tanü asenok kangshir. Asenoki alima topur junga yanglur, yangji asenok ajak telongjem nung putepa linür saka melitetter ta kangshiba tashidak ya election shitak masü agiba nungi tenzükba tashidak lir. Tanübo asenoki ibaji atema taneptsü bushir. Aji oda, tanü yimten aser loktiliba mesüngjemteti kangshiba ya electoral tiyazü nung ajemdaker election nung mapa tamajungbo ajak inyaktema inyaker yimsüsürtem shimba süngjang onga achirba lir. Joko asenoka tadongtsü ka metongi yamai timtema menemzütsüsa, tang nungi tenzüka electoral merüktetba mapa nung ajaki ochishia shilem agitsüla. Tanü asen lima nung election timi agitsü jembiba maparen takok ngua inyaktettsü asoshi mezüngbuba teinyaktsü mapaji electoral roll merüktetba mapa ya asütsü. Joko, electoral merüktetba sülenbo kodang election arudir, electoral roll nung alir ajaki timtem arema pei vote peisasa enoktsütsü asoshi polling station-i aotsüla. Aikati election ya zübazübaa bilemer, ajisüaka asen lima nung tzü mopong ajungtsü asü majungtsü, mozü ki aser kaketrejutem junga ayutsü asü mayutsü, terenlok mapa takok ngua inyaktsü asü meinyaktsü, lanurtem nem tazüngdak aser mapa inyakdak shitak agütsütettsü asü magutsütettsü, item ajakji election dak keta lir. Tangbo election junga magiba agi aika gari lenmanga tamajung nung jajadar asütsüa akok, aika tzü tajemtsü agi anünga alitsüa akok, mozü ki aika nung anepalur doctor aser nurse malitsüa akok ano tesem aika nung government school ki nungbo nashi ak dang mejangdar asütsüa akok. Aji oda, election shitak magiba ajanga, taneptsü ngutettsüba shiranger aika pei alidak mozü kidang taneptsü mangu ser sür alitsüa akok, tanurtem aika school mazüng anener alitsüa akok aser tesem aika nung light junga maruba ajanga mapa meinyakteti timtema alitsüa akok. Item onüktemji nübortemi jembia electoral roll merüktettsüla aser kodang election arudir, pei vote peii enoktsüla. Aji oda, joko taruba kümbo Feb- March nung election alinungji, taküm küm ABAM Clean Election anogo February 26 nungbo arogo ajak nung tenla kidang amangba pur ajaki teka mekanger election nung timi shilem agitsü asoshi sarasadema tenangzükba ajangajanga agitsüla.