E-Roll tasüngtetba akümer; Taila voter lakh 2 shi agienogo: CEO

Kohima, January 25 (TYO) : Nagaland nung Electoral roll ano masüngtet saka küm shia tasüngtetba akümer, kechiyong 2011 nungi tesüiba küm 6 tsüngda bogus electorates indang tenüng lakh 2 den tema agienogo, ta State Chief Electoral Officer (Officiating), M Moa Aier-i ashi.
“Systematic Voters Education and Electoral Participation (SVEEP) tenzükba sülen nungi State Election Department-i Electoral Roll tajungba nung ketdangsüa repranger. State yongsükbo lakh 20 dang liasü sürnung 2011 tashi nung Nagaland nung vote agütsür nisung lakh 13.38 shi aküm, ta Bodbarnü 7 buba National Voters Day sentong nung jembidang M Moa Aier-i ashi.
“Ajisüaka tesüiba küm 6 tsüngda Electoral Roll nung nisung renlokba tajemba aküm aser lakh 2 shi ajemer tang vote agütsür lakh 11.38 shi lir. Iba ajanga kümshia Nagaland state indang electoral roll tasüngtetba küma aoer ta sayur” ta paisa shisem.
Clean Election atema jembidang, “yimtenren teloktemi teyari agütsüdar aser külen Naga Hoho, Eastern Nagaland People’s Organisation, Naga Mothers Association, Eastern Nagaland Women Organisation temi anir NGOs and civil society tem, kaketshirtem aser Nagaland Baptist Church Council o tanga arogo teloktemi yaritepba ajanga takok ngua inyakdar” ta State Chief Electoral Officer (Officiating)-isa metetdaktsü.
February-March 2018 meta Nagaland nung general election agitsü lir anungji civil society temi taküm iba asoshi tali inyaktsü mepishir, ta paisa shisem.
Sentong nung Chief Secretary, Pankaj Kumar-i National Voter’s Day tenangzükba agidaktsü aser iba mapang pai ‘one person one vote’ indang jembi.
Miss Nagaland 2016 aser SVEEP atema State Icon, Vilokali Zhimomi-ia Clean Election indang mangdang lemsatep.
“Clean Election ya democracy kümzüka ayutsü aser tajungba kümdaktsütsü atema lir. Iba maparen ajanga nübortem nem ochimashi indang onüktem jangjashidaktsür aser süpokrem o ozüng alema inyakba mapa nung shilem magitsü tenangzükba agidaktsür,” ta lai ashi.
State Icon (People With Disability), Diethono Nakhro-ia o jembidang ashiba agi, Naga loktiliba nung matamabensartem senzüka yutsür aser iba asoshi kanga sasa bilemer.
Nagaland nung election dak sendakba nung matamabensartemi vote agütsütsü atema maongka magütsür, ta laisa ashi.
Nagaland nung matamabensar meyirjang aika atema election maparen ya parnoki majangshidangba mapa ka lir aser parnok election campaign nunga shilem magidaktsür aser vote agütsütsü atema yimli magütsür, ta Diethono Nakhro-isa metetdaktsü.
“Vote agütsüba indang temeten süoki ia agidi ta süra, matamabensartem nema pei indang vote agütsüdaktsütsüla” ta laisa shisem.