E. Roll yanglushir

Tang Nagaland nung alir senso ka asoshi tongtibang osang kaji electoral roll yanglushiba mapang ya asütsü. Electoral roll yangluba tetezü tatar yimsüsür shimtsü asoshi senso shia nem temeten kasasa agütsütsü. Iba temeten ya tetsür o tebur na, takar o sensaker na aser tulur o tilar na  prongla atema kasasa lateta yuja lir. Tanü putu nung democratic election agiba tajangzükji aji asütsü. Tang ama electoral roll yanglushiba mapang ya, talisa, lanurtem shirnok arishi küm terti ajunger, parnok atemaji mezüng electoral roll nung tenüng züluokdaktsütsü maongka angur. Aji oda, tanur ka asoshi yimten  nung shilem agitsü meshia akümba aser temeten anguba tamaitsüji electoral roll nung tenüng aibaji asütsü. Jungjunga bilemdangra, electoral roll nung tenüng alir o malir naji yimten nung tepila talangka lir, kechiyong aginüyonga maginüyonga alima ya electoral roll nung alirtemi bener aor. Aji oda, tanü asen lima nung gari lenmanga meyanglutet timatemba aser tanurtem tajung kümnüseta mekümdaktsütet shisaboluba tensa tia ajak ya electoral roll nung alirtemi yangluba tensa tia lir. Aiben asenoki asen lima tamajungba küma aoba angudang tatar yimsüsürtem aitsür, ajia shitak saka jungjunga shisadangra shitakba taiji item tatar yimsüsür shimertemji tai asütsü aser itemji asenok lir. Aji oda, asen lima junga renloka aotsü asü maotsü ta asüba tasüngdangba nung telangzüba agütsürtemji electoral roll nung alirtem ya lir. Atangji, asen lima nung election junga mgitetba agi nisung aikati pei tenüng electoral roll nung liaka vote agütsüi moi alitsü. Ajisüaka, vote enoktsüi maortem indang vote dena taortemi ajentsür, anungji election yimya majungba agi asenok vote enoktsüi mouaka asen vote-vo enoktsür asünungji alima raksaba aser loktiliba mejungi kümdaktsütsüsa agitetba telemtetba agirtem rongnung asenoka adener. Senso kati yamaji mesüdaktsütsü tim aser iba ama tim masüba mapaji nokdangtsü asoshi senso shiai election nung shilem agitsüla. Iba nükjidong nung mapang shia electoral roll yanglushir. Iba ama mapang nung, talisa, yimten telok (political parties) nung lenirtemi temulung agütsütsüla, kechiyong electoral roll nung alirtemiang yimten telemtetba agitsü. Ajisüaka, asen lima nungbo, tesasatsüka, election mapang nung khen aser election temer pei agitsü bushiba mapang Kohima nung yimten lenirtem mazüngi senzütepba dak alaka, tang ama electoral roll yanglushiba mapang pei constituency aser pei polling booth nung electoral roll nungi agientsü pur aser züluoktsü purtem tenüng bushia inyakba mangur. Atangji, itemji inyaktsü atema Election office nungi nisung shimer yoktsü saka item denji yaritepa yimten teloktem nung lenirtemi shilem magira electoral roll-ji taginüba ama shitak meyanglutettsü. Küm aika asenoki election nung takok ngunüdang aser constituency delimitation mapang pei constituency kümzüknü dang electoral roll nung tenüng talila aser tiyazü aika enoka amshir. Iba jagi asenok nütsüng yongsük o electoral roll nung aliba yongsük na mesüteper. Taaktsüka, tesem kar nungbo nütsüng yongsük dang nungibo electoral roll nung alir tenüngtemang teimba putetba osanga angashiogo. Ibaji Tsüngrem tsüngdang tai temenen tulu aser nisung tsüngdanga maksü tuluka asütsü.Tiyazü vote aika agi koker MLA ka alitsüba dang nungibo ochi vote ishika ser MLA maliang tajungba ta asenoki angatettsüla. Tanü putu ya asenok tia ajung technology tapu balala purapitetba ajanga ochimashi mapa inyaktsü mekoki kümdagi. Joko, asenoki electoral roll nung tenüng aika enoknüyonga meinoktettsüsa aser mapa meinyak ser bill agizüka magitettsüsa mapang tajung ka agi tongogo, kechiyong item ajakji technology ajanga inyakyim balala agi puteta adoktsü, anungji machine nem asenok kangshia ochishia lidaktsütsüsa inyakdaktsüba dang nungibo asenoksasa tamasayongi ochishia inyaktsü mulungtetter ochishia aliba tajungba asütsü. Election ya temenen masü saka asenoki electoral tai yanglubajiang temenen, election tai masü saka asenoki election nung shilem junga magibajiang tai. Electoral shitak yur asenoki election nung shitak shilem agira asen lima nung inyakyim aser tensa mapang ajak shitak akümtsü.