Eagle Club, Longsa-i Green Village mapa nung yariteper

Dimapur, August 18 (TYO) : Longsa Baptist Arogo 2016 küm tepela Centenary mong amongtsü nükla nung yimden ajanga Longsa yimtsüng Green Village ka küma yangertsü sangdonga maparen inyakogo.
Iba mapa yarisema Longsa Eagle Club-i Centenary Jubilee matong tashi nung yimti yimdong tobur jungdaktsütsü asoshi yimdong tepiyong green leaves pot nung tema yutsütsü mangdang yur maparen tenzükba sentong 2015 August 8 nü Dr. Mapumeren CVO, Mokokchung ajanga lapoktsü.
Tanü putu nung meimchir asoshi tebilemtsü tulutiba rongnung tzü mopung ya ka lir. Anungji iba mapa ya alima tobur jungdaktsüba dang masü saka tanü alima rangben tebilemtsü dak kongshia tzü mopung wazüka ayuba nung Eagle club-i tongtipang aser tapet mera agiba ka alitsü.
Iba project tenzükba sentong nung Longsa yimden kübok lokti telen balala nungi arua adenbapur aser iba project nung yaritepa arur ajak dang pelar ta Eagle club tir Wb. Temsüyanger-i sangdong ka nung metetdaktsü.