EAM Jaishankar-i China foreign minister, Wang Yi ajuru

Beijing (China), Luroi/August 12, 2019: Hombarnü Diaoyutai State Guesthouse, Beijing nung Indian External Affairs Minister, Subrahmanyam Jaishankar aser China tatong Tir, Wang Qishan na leniba nung lenirtem senden amenba noksa nung angur.

Beijing (China), Luroi/August 12 (Agencies): Hombarnü China yimtiba, Beijing nung India External Affairs Minister, S Jaishankar-i Chinese foreign minister, Wang Yi ajurua senden amen.
Diaoyutai guest house nung lenir ana senden amen; iba ya taoba mapang Chairman, Mao Zedong’er ki liasü saka tangbo bendanger ketdangsertem agizüktsü atema amshir.
Amongnü Jaishankar apusoa Beijing-i ao. Taküm küm tatemlen Ato kilonser, Narendra Modi aser China Tir, Xi Jinping na senden amentsü lia Foreign Minister ana jelia senden amener.
Jaishankar aser Yi na leniba nung India-China High-Level Mechanism on Cultural and People-to-People Exchanges (HLM) senden amen. HLM nükjidong ya linük ana nüburtem tsüngda tesendaktep tajungba akümtsü aser tourism, art, films, media, culture aser sports ajungkettsütsü atema lir.
Ministry of External Affairs-i sangdong ka ajanga, “2buba HLM senden ajanga mezüngbuba HLM senden nung lemtetbatem inyaktsü atema maongka angutsü, aser linük ana tsüngda nüburtem tesendaktep tajungba akümtsü atema jembitsü,” ta metetdaktsü.
Tanep External Affairs Minister-i China tatong Tir, Wang Qishan-a ajurua liasü.
Ministry of External Affairs otongdar, Raveesh Kumar-i, “China ya tongtibang partner ka lir. Linük ana tesendaktep atema o lemteptsü asoshi lenmang aika lir. Iba denji külemi tesendaktep yanglur küm 70 ajungbamong amongtsü atema-a o lemteptsü,” ta jelia sangdonga liasü.