EAM Sushma Swaraj-i UN tongti Guterres den senden amen

New Delhi, Mongputeni/October 03 (Agencies): Tanü New Delhi nung United United Nations Secretary-General, Antonio Guterres-i India External Affairs Minister, Sushma Swaraj ajurua climate change aser United Nations Security Council reforms densema tongtibang onük aika nung o lemtepogo.
Ministry of External Affairs otongdar, Raveesh Kumar-i Twitter ajanga foreign minister aser UN Secretary General na senden amenba osang lemsatep.
Kumar-i, “Tongti tentet den külemi amalitepa inyakdar. EAM @SushmaSwaraj-i UNSG @antonioguterres pelaa agizük. Climate change, UNSC reforms aser tanga onük aika nung o lemtepogo,” ta metetdaktsü.
Tentonü/Hombar nungi tenzüka Guterres-i India semdanga lir.
Tanü pai Ato kilonser, Narendra Modi nem UN indang tematiba akhümket sempet Champions of the Earth Award aguja liasü.
Ato kilonser, Modi aser France Tir, Emmanuel Macron nati tatishitsü tajung sayua sustainable development aser climate change atema inyakba atema tena nem iba award agutsütsü, ta tawa sangdonga liasü.
Küm shia agutsüba ‘Champions of the Earth’ award ya sorkar lenirtem, civil society aser private sector nem aguja arudar.
Mahatma Gandhi sor küm 149 ajungba anogomong denjia UN Secretary-General Antonio Guterres India-i arua liasü aser paia yashi Mahatma Gandhi International Sanitation Convention nung shilem agiogo.