‘Earth Day’ nüngtem nung Alempang ward merüktet

Mokokchung, April 23 (TYO): April 22, 2017 nü Alempang Ward Sanitation committee ajanga kiyong nung aliba jana indokdak tesem ajak merüka amung. Iba Anogo ya “World Earth Day” amungba den külemi Swatch Bharat sentong kübok MMC-i jana indokba gari agüja aliba amshia mapa tenzükba sentong ka liasü.
Iba maparen nung Alempang Youth Association nungi temulunger nübu aika densema takok ngua tembang. Alempang Youth Association züngsemtemi jana indokba tesem merükba den külemi kiyongertem den jana koda bendanga indoktsü iba indang lemsatepa liasü. Association ajanga Alempang Ward Sanitation Committee den kiyong merüka alitsü asoshi maparen ajak nung teka amtepba inyaktsü mulunga aliba metetdaktsüba den külemi, kiyong nung jana indokba yimya mita alitsü telemtetba agiogo.