Eastern Naga People’s Union Mokokchung Town-i Ao Senden den ajurutep

Dimapur, September 8 (TYO) : September 7, 2015 anogo Eastern Naga People’s Union Mokokchung Town (ENPUM)-i Ao Senden Mendenpur aser Presidential Executive Council den Ao Senden Office nung ajurua senden ka agi.

Iba senden nung ENPUM-i Aor-ji par tsürabur ka ama teti züngshir aser ibayongji parnoki Ao Senden nem akhüm agüja ajuruteper ta ashi.

Iba senden nungsa parnoki Ao Senden den temeim mesamatsü asoshi parnok kin sü (shawl) ka ajak tenüng nung Ao Senden tir Wb. Imolemba Jamir nem abenloktsü aser tang tenzüka aliba Ao Senden Office building asoshi tenla Rs. 10,000/- (Ten Thousand) agüja liasü.

Iba senden akaba ajanga tarutsü nung Eastern Naga nüburtem aser Ao Senden telongjem maneni tajungba nung aotsü yimlaba Ao Sendeni metetdaktsüba den Ao Senden-ia akokba tashi agi maneni yariteptsü ta ENPUM dang ashi.

Tongtibangsa Eastern nüburtem Aotsür-Aor kidang shirnoksa yariteptsü aser kaket shisatsü angazüktsü asoshi yua lir, parnok ajak dang meima pei chir ama züngshia parnok ajak shisaliok tajungtiba nung züngteta yoktsü asoshi Ao Sendenia Aor nüburtem ajak dang ayongzük.