Eastern Sumi Hoho-i takhangba agütsür

Dimapur, March 27 (TYO) : Seyochung yimtsüng nung aliba Sumi nunger aser district administration-i memeteti April 2013 nung nisung kari Seyochung yimtsüng nung Atohe Sumi’er ki tashiyim agi raksatsü.
Iba dak sendakba nung Seyochung nung alir Sumi nungertemi Kiphire Deputy Commissioner dangi tezüluba agütsü saka District Administration-i mapa kecha meinyak aser iba sülen iba kimung nung Sangtam Baptist Arogo Seyochung indang Women Pastor ki yanglu, ta Eastern Sumi Hoho (ESH) sangdong ka nung metetdaktsüogo.
Ano, March 6, 2016 aonung Seyochung Village Council-i Seyochung nung alir Hutokhu Sumi aser District administration-i memeteti Hutokhu’er ki raksatsü ta osang tejangja angazüker, ta sangdong nungsa shia lir.
Iba dak sendakba nung ki kiburi Police Station Kiphire nung FIR keno ka benok saka police-i FIR magizük lir. Iba kasa onükji Deputy Commissioner dangia benogo saka tang tashi District administration aser police-i kecha meinyak lir, ta ESH sangdong nungsa metetdaktsü.
Iba tatalokba nung ajemdaker ESH-i onük pezü inyaktsü atema takhangba agütsür aser itemji March 2, 2016 nü ki raksatsürtem aputsü; Village Council nem raksatsüba ki tanaben yangludaktsütsü; takoksa ajuruba ki kibur nem temenok agütsütsü aser Sumi nunger kimung nung Women Pastor ki yanglua alibaji raksatsütsü lir, ta ESH Tir, L Kahuvi Sumi aser Tezülur Isak Sumi nati sangdong nung shia lir.