EC flying squad-i Rs 50,000 agiba atema apu

Guwahati, April 1 (Agencies): Hombarnü Guwahati nung shishilembar ka ket nungi sen meshia agiba atema police-i election flying squad nung züngsem ana puogo.
Tenaji Dipankar Hazarika aser Ali Kamal Hussain na lir aser tenati Jahangir Alam ta ser Barpeta nungi shishilembar ka dang nungi sen meshia agi, ta osang ajanga ashi.
West Guwahati Assembly constituency kübok garitem mita reprangdang iba ya atalok.
Pa ket nungi sen meyirjang 50 meshia agiba atema Jahangir Alam-i Indian Penal Code nung arrla 392 kübok ken o ka benok.
Alam ji Gorchuk nungi Rani-i motor parts alitsü atema aodang flying squad-i pa indang gari anendaktsü. Police-i pa indang gari mita reprangba sülen tanga garitem reprangi orr lia FST nung civil officials anati pa ket nung aliba Rs 2,50,000 apu aser idak nung jagi sen lakh 1 kua ta meshi, ta Alam-i ken o benokba nung shia lir.
Alam-i senji magütsütsü ta ketdangser ana dang ashi saka tenati Rs 2,50,000 nungi Rs 50,000 agiteta ayu aser iba osangji police dang mashitsü atema tetuyuba agütsü, ta Alam-isa ashi.
Pai sen paikaji kong nungi angu ta police-i asüngdangdang Alam-i “Ni motor parts alitsü atema Garchuk vegetable market nung kinunger ka ket nungi sen lakh 2 aputsü atema orr aruba” ta langzü.