EC-i ayongba EVM Hackathon agiogo

New Delhi, June 03 (Agencies): Honibarnü Election Commission of India (ECI)-i ayongba Electronic Voting Machine (EVM) hackathon agiogo, aser iba sentong nung yimtenren party ana- NCP aser CPI (M) nati dang shilem agia liasü.
Chief Election Commissioner of India, Naseem Zaidi-i, party anapronglai EVM hack asütsü memerang, saka EVM amshia sayuba dang reprangogo, ta ashi.
Pai, “Party anapronglai electronic voting machines amshibayim agi temulung süogo,” ta ashi.
Osangbenertem den jembidang EC-i agiba agi, NCP nungi teshimtet züngsemtemi iba tayongzükba nung shilem magi, saka EC dang ECI indang EVMs aser State EC EVMs na bendangba system tajungba yanglushitsü atema mepishi.
Maharashtra Municipal Elections nung amshiba EVM dak sendakba nung NCP-i asüngdangba ka langzüdang Zaidi-i, “Onoki guarantee dang asütsü akok mesüra EC indang EVMs dang certify asütsü akok; EVMs mesükba yangluba (prototype) atemabo onoki guarantee agütsütsü makok,” ta ashi.
“State election commission, Maharashtra-i urban local body elections atema amshiba EVMs ji ECI indang masü,” ta Zaidi-i NCP dang ashi.
Ano külen CPI (M)-ia EVMs hackathon nung shilem magi, saka EVM inyakyim indang ang metetnüa liasü, ta Zaidi-i ashi.