EC-i electoral roll yanglushiba maparen tenzüktsü tuyur

Agartala, April 02 (Agencies): Assembly election agitsü aliba state pongu dak alaka tanüngba state aser Union territory ajak dang Election Commission (EC)-i electoral roll yanglushitsü aser metongshitsü atema maparen tasen tenzüktsü tuyuogo, ta tanü Agartala nung ketdangser kati metetdaktsü.
Osangbenertem den jembidang Tripura nung Additional Chief Electoral Officer, Debashish Modak-i, “‘National Electoral Roll Purification & Authentication Programme (NERPAP)’ kübok electoral roll yanglushiba maparen Hokolbarnü tenzükogo aser iba ya August ita tashi inyaktsü,” ta ashi.
Paisa, “Yaküm-a NERPAP programme agiogo aser takok ngua inyakogo. Iba maparen ya mapang telemsa balala yur inyaktsü,” ta ashi.
State shia indang electoral rolls draft madokdang ita pongu programme ya tembanga inyaktsü, ta paisa ashi.
Taruba electoral rolls draft adokba sülen January 1, 2017 anogo tashi nung arishi küm agi temsüa alir voter list reprangshitsü, ta pai ashi.
“Arishi küm 18 pur dak tongtibangsüa rangloker vote agütsütsü temsüa alir ajak electoral list nung inoktsü, aser nisung ka tali züluokba shimtoktsü, iba den külemi asürtem, talitak tesem melenshir tema shimdoktsü,” ta Modak-i ashi.
Ajisüaka April-May ita election agitsü aliba state tem- Assam, Kerala, Tamil Nadu, West Bengal aser Puducherry bo iba nung ya madener.
Mobile ajanga vote agütsütsüpurtem nem electoral roll dak sentakba osangem metetdaktsütsü atema EC-i vote agütsütsüpur mobile number den pa/la indang EPIC (Elector’s Photo Identity Card) number-a bendener.