EC-i Star Campaigners atema tetuyuba tasen agütsür

Dimapur, October 9 (TYO): COVID-19 mapang Election Commission-i Star Campaigners asoshi inyakyim kar latettsüogo ta Chief Electoral Officer Nagaland-i ashi.
Recognized National/State political party tem atema star campaigners ji nisung 40 aliba nungi 30 aser unrecognized registered political party tem atema nisung 20 aliba nungi 15 kümdaktsür, ta CEO Nagaland-i metetdaktsü.
Tanabuba nung, sangdong agütsüba sülen anogo 7 tsüngda star campaigners indang tenüng agütsütsü ta mapang latetja aliba nungi anogo 10 kümdaktsür. Anungji star campaigners agütsür aliba political party temi iba mapang tsüngda tenüngtem reprangshir agütsütsü akok, ta paisa ashi.
Political party tem atema star campaigners-i nüboyimtsü temepishibaji nüboyimba metenzükdang, ghonda 48 jelia district election ketdangpur nem agütsütsüla. Iba ya mapang shitak nung teinyaktsü maparen ajak inyaktsü atema lir, ta CEO Nagaland-isa metetdaktsü.