EC-i state 5 nung assembly elections agitsü anogotem sangdongogo

EC-i state 5 nung assembly elections agitsü anogotem sangdongogo

Mongputeni/October 06, 2018 nü New Delhi nung osangbenertem senden ka nung Chief Election Commissioner, O P Rawat den EC temi state pongu- Madhya Pradesh, Rajasthan, Chhattisgarh aser Mizoram nung assembly election agitsü atema anogotem sangdongba noksa nung angur.

New Delhi, Mongputeni/October 06 (Agencies): Tanü Election Commission-i taküm küm tatemlen state pongu nung assembly election agitsü atema anogotem sangdongogo.
Chhattisgarh nung assembly menden 90, Madhya Pradesh nung menden 230, Mizoram nung menden 40, Telangana nung 119 aser Rajasthan nung assembly menden 220 atema election agitsü.
Chhattisgarh nung assembly election shilem ana küma lemsar Yimpoksüi/November 12 aser Yimpoksüi 20 na nung agitsü; Telangana aser Rajasthan na nung kenüyongi Luchii/December 7 nü agitsü; Madhya Pradesh aser Mizoram na nunga kenüyongi Yimpoksüi/November 28 nü agitsü.
Tanü Chief Election Commissioner, OP Rawat-i state pongu nung election agitsü atema anogotem sangdong.
Chhattisgarh nung mezüngbuba shilem nung menden 18 atema aser tanabuba shilem nung menden 72 atema election agitsü aser Yimpoksüi/November 20 nü vote azüngtsü.
State pongu nung agiba election osangji Luchii/December 11 nü sangdongtsü.
Item election ya BJP atema kanga tongtibang asütsü, kechiyong sangküm Lok Sabha election nung item election ajanga shilem tulu agitsü.
Item state pongu nung BJP-i yimsüsüba state asem (Rajasthan, Madhya Pradesh aser Chhattisgarh) lir, Mizoram nung Congress sorkar lir aser Telangana assembly manendang Telangana Rashtra Samithi-i yimsüsüa liasü.
Item state ponguprong nung election code of conduct tenzükogo.
State pongu nung election sentong:
CHHATTISGARH: nomination agutsütsü atema tatembangbuba anogoji- October 23, Candidate-i tenüng agientsü atema tatembangbuba anogo- October 26, election agitsü anogo-November 12, vote azüngtsü anogo- December 11.
MADHYA PRADESH aser MIZORAM: nomination agutsütsü tatembangbuba anogo – November 9, Candidate tenüng agientsü atema tatembangbuba anogo- November 14, election agitsü anogo- November 28 aser vote azüngba anogo- December 11.
TELANGANA aser RAJASTHAN: nomination agutsütsü atema tatembangbuba anogo – November 19, Candidatre tenüng agientsü atema tatembangbuba anogo- November 22, election agitsü anogo – December 7 aser vote azüngtsü anogo- December 11.

You must be logged in to post a comment Login