EC-i Telangana assembly election atema terenemshiba asadangogo

New Delhi, Mongputeni/Oct 24 (Agencies): Election Commission-i Telangana assembly election agitsü atema terenemshiba asadangogo, aser parnoki kanga melungsüa liasü.
Telangana nung assembly election Luchii/December 7 nü agitsü lia Chief Election Commissioner, O P Rawat leniba nung züngsem 11-i Telangana nung ketdangsertem den külemi election atema terenemshiba asadanga liasü.
State kübok district shia nungi district collectors aser Superintendents of Police-i Election Commission team dang electoral rolls indang metetdaktsü, electronic voting machines tendangba, tensa azüokba aser Mode Code of Conduct benoka inyakba osangtem metetdakja liasü, ta tanü ketdangsertem sangdong ka ajanga metetdaktsü.
Tang tashi nung inyakba mapatem jagi melungsüa Election Commission team-i district collectors aser police ketdangsertem dang state nung mezüngbuba general election junga agitettsü atema kanga meranga inyakdaktsüner, ta ashi.
Telangana ya election junga agitetba state tem rongnung züngoktsü atema meranga inyaktsüla, ta EC team-isa ashi.
EC team-isa ketdangsertem dang election inyakyim junga benoktsü, telatetbatem junga benshitsü aser election dak sendakba maparen ajak timi ochishia inyaktsü metetdaktsü, ta kasa sangdong nung shia lir.
Yakünü EC team-isa state nung recognised yimtenren party 9 den senden mena liasü.