EC Tashi

General election aser assembly elections tashishitsü kecha meketi tipdema junga agitettsü atema election maparen ajak ketdangsüa inyaktsü asoshi linük temzüng nung Election Commission (EC) nem temeja tashi agüja alibaji atamata tashi masü, ajisüaka taoba mapangtem den medemdangra tan election nung EC-i parnok nem agüja aliba tashi junga mamshiteter ta aikati bilemer. Ibayongji tawa Supreme Court (SC)-i tan Lok Sabha election nüboyimba mapang nung Model Code of Conduct (MCC) anema kanga bulua inyakba reprangteta Election Commission mejanga aliba nungi saakdaktsüogo. Tan election nung ruling BJP, Congress aser tanga opposition party balala nungi lenirtemi MCC alema inyaker, ajisüaka EC-i mangu aser mangashi atemer toktsübayong SC-i parnok akasodaktsü. Iba sülen ang EC-i yimtenren lenir pezü dak tenarong mesüka liasü. Parnok rongnung BSP tongti lenir, Mayawati-i Muslim nunger dang vote melemsatsü mepishi aser Uttar Pradesh Chief Minister, Yogi Adityanath-i Muslim aser Hindu nunger tetshia iba election ya ‘Ali’ aser ‘Bajrang Bali’ na tsüngda tetoktepba lir, ta jembi. Ibayongji EC-i tena mapang tatsüka atema election nüboyimba nung shilem magitsü tenokdangba agütsü. Tang EC nung tongti ketdangsertemi parnok nem agüja aliba tashiji mamshitetra aser MCC telatetbatem junga mebenokra nüburtemi mapang talangka EC dak melung melemtettsü. SC-i akasodaktsüba sülenbo EC-i arakzüogo, saka iba dang nungi alia inyaktsüla ta bilemer. Linük temzüng kübok Arrla 324 ajanga elections ketdangsütsü, tetuyuba agütsütsü aser lenirtem azüoktsü atema EC nem tashi tulu agüja lir. Ano tensa mapang apir joko India nunger election inyakyim nung technology amshia osang tai prokba-a azüoktsüsa akümer. EC tetuyuba nung election mapang nüboyimdang sepaitem tenüng amer vote memeshitsü atema shia lir, ajisüaka Ato kilonser, Narendra Modi-i tetuyuba alema sepaitem tenüng amer votes meshir, ta opposition-i tai tongloktsür. Yimtenren nung tajangzük atema linük sepaitem tenüng tetshia lira Ato kilonser nem temerenshi agütsütsü, ta tanü Election Commission osang ka ajanga metetdaktsüogo. Election atema nüboyimba mapang nung lenirtem aikati IAF-i Pakistan kübok Balakot nung Jaish-e Mohammad camp amakba tetshiba sülen EC-i nüboyimdang sepaitem metetshitsü tetuyuba agütsü, ajisüaka tan election nung BJP-i linük security ya tongtibang onük ka kümdaktsüogo. Ano külen election mapang nung Central agency temi opposition lenirtem ki dang mita aoba aser public broadcaster, Doordarshan amshiba ya sorkari tashi alia amshiba ama reprangteter. Taoba mapang Chief Election Commissioners- T.N. Seshan aser J.M. Lyngdoh nungeribo ozüngji tema tazütsü ka ama masü saka atangji benoka inyakogo. Ajioda Supreme Court-i EC dang parnok nem agüja aliba tashi nenshia metetdaktsüba sülen tang teinyakdak Chief Election Commissioner, Sunil Arora koma inyakdir ta India nungeri repranga atadar.