EC Tir, Juncker-i Russia semdangtsü

Brussels, May 30 (Agencies): European Commission (EC) Tir, Jean-Claudee Juncker-i taruba June ita Russia semdangtsü sentong renemba osang ka tanü, Hombar nü metetdaktsüogo.
Russia nung ayongba tongti rongsenren senden ka nung shilem agitsü aser Russia Tir, Vladimir Putin den tsüngdong ajuruteptsü nükjidong nung Juncker-i tan Russia semdangtsü sentong renemer lir.
Russia-i Ukraine nungi Crimea peninsula tashiyim agi 2014 küm agiba sülen German Chancellor, Angela Merkel densema, European Union (EU) nung tongti lenir aikati Russia semdanga lir saka Juncker-i EC Tir menden benokba sülenbo tan mezüngsüa Russia semdangtsü sentong renemer lir.
“Ozü lenisang, Juncker-i tan Russia semdangdang, EU aser Russia na tsüngda tesendaktep tajungba küma yanglushitsü atema Russia lenirtem ajungshitsü sentong renema lir,” ta EC otongdar, Margaritis Schinas-i osang jangjashitsü.
Juncker-i tan Russia semdanga par lenirtem den senden amenba sülen EU-i Russia anema benokba rongsenren tenodakdangba sentong maneni atsünglangshitsü mesüra kasaji agientsü onük EU lenirtemi June ita 28-29 nü tashi amentsü ayonba senden nung benoktsü.
“Crimea tashiyim agi agiba ken o nung ajemdaker Russia anema benokba tenokdang sentong atsünglangshitsü mesüra kasaji agientsüji Russia-i Minsk nung agiba tezüngzüktep mapa küma inyakba aser Ukraine’er peisasa pei madak yimsü asütsü temeten nem aküm agütsüba dak keta lir,” ta Schinas-i ashi.
Paisa ashiba agi, Juncker o Putin nati Russia kübok St. Petersburg yimti nung ayongba senden nung ajuruteptsü saka tenati jurila senden ka senden tezülen amentsü asü mamentsü iba osangbo tang tashi mejangjateti lir.
Ano külen, “Juncker-i tan Russia semdangba ajanga ozü Russia aser EU na tsüngda adokba mangatettepbaren bentettsü maongka tajung angur asütsü,” ta shia, Kremlin otongdar, Dmitry Peskov-ia Juncker-i par linük semdangtsü asoshi sentong renemba osang pela agizükba olen ka metetdaktsü.
North Atlantic Treaty Organization (NATO) aser EU na nung züngsemba Germany aser France na pusema, Russia den tesendaktep tamajungba mekümdaktsütsü asoshi par lenirtem den jembiteptsü senden mena mangatettepbaren bentettsü asoshi Juncker-i taoba mapang metetdakja lir.
Russia-ia par tepuokdak puoka ayur Ukraine’er tetsür miktar tayimtsü anishir, Nadezhda Savchenko toaba hopta chiok aser ibaji ajanga par linük aser EU na tsüngda tesendaktep tera tajungba akümba osang jangjaogo.
Russia-i aniba Eurasian Economic Union (EEU) aser EU na tsüngda tesendaktep tajungba küma yanglushitsü asoshi Juncker-i shiti ka ajanga Putin yaküm, 2015 küm November ita ajungshia liasü.