ECI-i ADC & RO Tening mapa nungi anentsütsü tuyur

Kohima, Rongchii (April) 12 (TYO): Tsüklai (February) 27 nü Nagaland assembly election indang osang sangdongdang aibelenba atema Election Commission of India (ECI)-i Tening Assembly Constituency nung Additional Deputy Commission & Returning Officer mapa nungi anentsütsü aser disciplinary action agitsü atema tetuyuba agütsüogo.
Iba tetuyuba ya hopta ana tejakdang agütsü aser iba nung state sorkar dang Tening nung Returning Officer mapa nungi anentsütsü aser disciplinary action agitsü atema shia liasü ta Chief Electoral Officer (CEO) Nagaland, Abhijit Sinha-i tanü ashi.
Returning Officer lenisüba kübok Metsüremi (March) 3 nü votes azüngdang aibelena osang tai sangokja liasü.
Iba anogo RO-i NPF candidate Namduadi Rangkau Zeliang-i votes 34 agi takok nguogo ta shia kulikaket agütsü saka kasa nikongdang result ji meyipa agi aser Nationalist Democratic Progressive Alliance (NDPP) candidate Namri Nchang-i votes 200 dak temai takok angu ta sangdonga liasü.
Iba inyakyim atema candidate aser NPF Party temi returning officer anema ken o tem benoka liasü.
State Election Secretariat-i ashiba agi Election Commission-i tetuyuba agüjaka State sorkari suspension order ano magütsü lir.