ECI-i NPF dang ita ana tsüngda party tamaitsü ken o angatetteptsü tuyur

Kohima, October 18 (TYO): Naga Peoples’ Front (NPF) election tamaitsü noksa ‘An tebong’ indang mangatettepji ita ana tsüngda NPF indang General Convention ka ajanga teloki anati bentetang, ta Bodbarnü Election Commission of India (ECI)-i tetuyuba agütsü.
NPF ya Nagaland aser Manipur state tem nung recognised State Party ka lir ta ECI-i agütsüba sangdong ka nung shia lir. Iba sangdong nung Sr. Principal Secretary, KF Wilfred-i sign süa lir.
“Party nem election symbol amshitsü atema ‘An tebong’ lemzükja lir aser ibaji Election Symbols (Reservation and Allotment) Order, 1968 nung aliba telatetbatem kübok Nagaland aser Manipur nung amshitsü agütsüba lir” ta ECI sangdong nungsa shia lir.
Taküm August 17 nü Neiphiu Rio-i pa NPF indang President ta tezüluba ka agütsüba sülen iba ken o adok. Ajisüaka, NPF indang Constitution nung ketdangpurtemji küm pungu kümsük inyaktsü lateta lir, ta ECI-isa shisem.
Party indang general convention nung central aser divisional office bearers shimer aser party-i 2015 küm agütsüba ketdangpurtem tenüng tarensen nung Dr Shurhozelie Liezietsu- President aser Apong Pongener- Working President ta zülua lir, ta ECI-isa metetdaktsü.
Rio-i August 17 nü agütsüba shidi nung pa NPF indang President shimogo ta shia lir. Iba atema telok ana- Liezietsu NPF aser Rio NPF nati Party Constitution kübok lateta aliba inyakyim kübok ken o angatetteptsü tuyur. Iba tetuyuba kübok Party züngsemtem aser ketdangpurtem ajak aiter, ta parnokisa shisem.
NPF Constitution nung Arrla XV ajanga iba ama ken o tem general convention ka nung active party members asemsü nung anasü agi lemtettsü akok ta lateta lir. NPF party Constitution nung latetba inyakyim meinyak tashi Commission-i iba ken o atema oshidang agütsütsü makok, ta parnokisa ashi.
“Iba mapaji ita ana tsüngda inyaktsüla” ta Sr. Principal Secretary, K F Wilfred-i sign asüba sangdong nungsa metetdaktsüogo.
Taküm July 19 nü T R Zeliang-i abiba NPF MLA 36-i Dr Shurhozelie-i aniba NPF sorkar atsüngdok aser parnokisa Dr Shurhozelie NPF President nungi agientsü takhangba agütsü.
Ajisüaka, Dr Shurhozelie Party President mapa nungi manen aser iba jagi temulung masüba MLA temi Neiphiu Rio NPF President asütsü shimtet aser ECI dang party tamaitsü noksa amshitsü asüngdang.