ECI malenbangtsüla

– P Tiamongba Aier

Congress lennir Rahul Gandhi-i Bihar nung ‘Vote Adhikar Yatra’ ayonga agiba nung nisung aikati shilem agia arudar aser iba sentong ya Opposition longjemba sabang ka ama akümba ajiteter. ‘Vote Adhikar Yatra’ ya anogo 16 atema agitsü aser Bihar kübok district 20 sema senzür September 1 nü Patna yimti nung tembangtsü. Kechiba iba sentong ayonga agir ta süra, Bihar nung taküm October-November meta assembly elections agitsü lia ECI-i mapang masüba ka nung electoral rolls atema Special Intensive Revision (SIR) agiba magizükba aser tim masü ta sayua agir. Bihar nung elections agitsü lia SIR agiba ajanga chichiba vote agütsütsüpurtem  tenüng züngdoktsü akok ta Congress-i anir Opposition telok balalai aitsür. Rahul Gandhi-i iba yatra ayongzüka agia arudang Opposition telok balalai ECI aser BJP aija shilem agia arudar. August 27 nü Tamil Nadu Chief Minister M.K. Stalin-i Muzaffarpur nung Rahul Gandhi, Rashtriya Janata Dal lennir Tejashwi Yadav aser CPI-ML lennir Dipankar Bhattacharya nunger den külemi iba sentong nung shilem agia liasü. Bharatiya Janata Party (BJP)-i Election Commission of India (ECI) ya par kübok yua lir aser parnoki aginüba ama inyaksangshidaktsür ta Stalin-i iba sentong nung jembidang tai tongloktsüogo. Ano, September 1 nü Patna nung ‘Vote Adhikar Yatra’ tembangba sentong nung NCP lennir Sharad Pawar aser SP lennir Akhilesh Yadav na den TMC aser Left party lennirtem adentsü osang angazüker. ECI scheme ajanga BJP aser parnok den yaritepba teloktem nem teyari agütsür aser Opposition nem takoksa bentsür arur ta ken o adoka jembir. Iba ECI scheme ajanga vote auyar ta Opposition-i ola adoker aser Rahul Gandhi-i onük jembi shia BJP ajanga reju balala amokbanger inyaksangshiba aser election nung parnok ajangzüktsü atema ECI amshiba indang jembia arur. Bihar nung electoral rolls indang Special Intensive Revision (SIR) agiba aser ano Rahul Gandhi-i Karnataka nung Assembly constituency ka nung bushisüngdang ka süa tai putetba ajanga electoral rolls nung tim masüba aliba jungkai adoka sayuogo aser iba ajanga Opposition jembitsü aser noktaktsü kuli tejangjatem nguteta lir. Bihar nung Special Intensive Revision (SIR) nung nüngdakba ama voters 98% temai enrolment form agütsüogo aser electoral list nung alir voters lakh 65 shi draft list nungi agienogo ta ECI-i ashir. Külen, Rahul Gandhi-i Bihar nung taoba electoral list nungi agienba voters teimba Dalit nunger, Other Backward Classes, Extremely Backward Classes aser nübo agi tangar memenepertem lir aser parnok teimba kati non-BJP party tem nem vote enoktsür ta metetdaktsüogo. ECI-i Bihar nung SIR inyakba ajanga Opposition sabang ka nung longjemdaktsüogo aser political party karibo tang teinyakdak Chief Election Commissioner mapa nungi anentsütsü atema-a jembiba angazüker. India ya alima nung democracy tulutiba ta züngshir aser iba ya linük aikati kanga nükshia repranger saka election maparen nung tim masüba aser külen tsütsü shir inyaksangshiba ya manenra democracy masü autocracy/dictatorship linük ka ama küma aotsü kecha meteta mali. Anungji tang Opposition-i tim masüa ta ola adokba mapang nübortemi ibaji pusema nungitra aser ola adoksemra Election Commission of India (ECI) ya tashishitsü maketba aser timi inyakba reju ka akümtsübaji takoktsü lir aser iba ajangaji political party tem masü saka nübortem ang tajangzük tuluba angutsü. Kokra, ECI nem ano tashi talila agütsüsemtsü aser Centre sorkar den masü saka Supreme Court of India den ang inyaksangshia aotsüsa ozüng kar yanglutet nungbo kanga jungla.