Eco & Statistics Department-i GSDP Workshop ka ayonga agiogo

Dimapur, May 19 (TYO):  Brehostibar nü Nagaland Economics & Statistics Department-i ayonger par Directorate Conference Hall nung Gross State Domestic Product (GSDP) tesayuba District Statistical Officer ajunga nem agütsüogo.
“State kati küm nung osettsüset yangluba aser tangar tenzükbaren dang GSDP ta ajar. GSDP bushitetba ajanga State shia nung rongsenren jenjang meteta akümer aser iba osang bushiteta ajanga temelenshi agitsü nüngdakba osanga meteta akümer,” ta tanü sentong nung Director Economics & Statistics, Y. Sacheo Ovung-i metetdaktsü.
Paisa ashiba agi, GSDP bushitetba ajanga state ka indang per capita income-a meteta akümer aser ibaji ajanga nübur taküm jenjanga metetdaktsür.
“2014-15 tsüngda Nagaland nung GSDP (Adv) noklang nung shilem 10.39 aliba osang bushitetogo aser kasaji 2015-16 tsüngda shilem 15.78 küma tajungba akümtsü imlar. Ano, 2015-16 tsüngda GSDP indang primary, secondary aser teriary sector tajungba küma, 30.06%, 16.23% aser 53.71% akümba osang bushitetogo,” ta shia, tan sentong nung shilem agirtemi pei department mapatong tajungba küma inyaktsü asoshi menungnangi bendanga agüja inyaktsü tajungshiba olen ka Sacheo-i metetdaktsü.
“Tan sentong nung shilem agirtemi Nagaland state-i küm nung rongsen tajangzük kwi ajangzüker iba osang meteta alitsü aser pei nem nungloktsüba mapa takok ngua inyaktsü ajungshir,” ta Nagaland Economics & Statistics Secretary, Kevileno Angami-ia tanü sentong nung sangoktsü.