Ecuador nung emergency sangdongogo

Quito, Ecuador, August 16 (Agencies): Ecuador yimtiba Quito anasa aliba Cotopaxi volcano nungi lendong agütsütsü achiteta Honibar nü Ecuador Tir, Rafael Correa-i linük nung emergency sangdongogo aser ketdangsertemi iba tesem anasa alirtem lendong nungi kümzüktsü meji nisung noklang ishika tesem nungi aienshidaktsüogo.
Iba lendong nung ketdangsertemi sorkar senpong nungi teyari mapatem inyaktsü temelaba agütsüogo.
Hokolbar nü nungi volcano jateta adokba ajanga mitsü prokshiba agi iba tesem lunga kilometre pongu (mile ana) dak tema süngogo. Mitsü anüngleni kaketa atuba aludang prokshiba, aut sentsü mesükba ali agi kilometre 50 (mile 30) shi nung lenmang, ki aser gari süngogo.
Presidential legal secretary Alexis Mera-i ashiba agi, mitsü maneni pokteta adokba ajanga iba tesemlen aliba yimtsüng tema azüngtetdaktsüogo.
Cotopaxi ya alima nung volcano rongnung tesashitiba ka ta züngshir. Iba vocano ya 1877 küm tesüsa tashii pokteta adoka liasü.
Ketdangsertemi Cotopaxi meküta aliba tenemtemi matutsü asoshi tenemi aturtem nema tetuyuba agütsüogo kechiba süra item tenem ya tenemi aturtemi kanga sapuba tenemtem lir.