ED-i tang agi tasembenbuba Vijay Mallya, April 9 nü jaoker

New Delhi, April 02 (Agencies): Tanü Enforcement Directorate (ED)-i tang agi tasembenbuba shishilembar tetsüdi, Vijay Mallya jaokba metetdakja, IDBI dang sen crore 900 apuba ken o nung April 9 nü Mumbai nung bushisüngdangertem matsüngdangi arutsüla, ta metetdaktsüogo.
Yashi Mallya-i ED dang May tashi mapang meshia liasü.
Ketdangsertem osang ka ajanga ashiba agi, Mumbai nung ED office nung Investigating officer (IO)-i United Breweries (UB) group Chairman, Mallya dang April 9 nü pa parnok matsüngdangi arutsü metetdaktsü.
ED ketdangsertemi ashiba agi, ED-i tang tesüsabuba pa jaoker asütsüa akok, kechiyong tamalen Mallya-i mepishiba IO-i agizüka liasü.
Ketdangsertemi ashiba agi, Prevention of Money Laundering Act (PMLA) kübok timba agi asemben dang jaoker.
Parnokisa, Mallya-i May tashi mapang meshiba temepishibaji IO-i magizük, kechiyong iba bushisüngdang nung pa adentsüji tongtibang, ibayongji pai mapang hopta ka dang agütsü.
Osang ka ajanga angazükba agi, Mallya-i April 9 nü ED matsüngdangi marutetra  Mallya indang passport agientsü aser court kati pa nem bail magütsütsü tuyutsü atema ED-i inyaktsüa akok.