Ed Sheeran-i Bieber melenzüka 2015 Fusion Festival nung shilem agitsü

Washington DC, August 07 (Agencies): Britain nunger kentener aser kenzülur, Ed Sheeran-i Justin Bieber melenzüka Britain nung agitsü ayongba 2015 Fusion Festival nung shilem agitsü renemogo.

Kasa sentong nung Bieber-i shilem agitsü asoshi mezüngbo renem saka pai sentong renemba ama shilem magitettsüsa akümba yong pa melena Sheeran-i shilem agitsü nangzük ta E! Online-i metetdaktsü.

Mepaidoktetba timtem kar ajuruba ajanga ni 2015 Fusion Festival nung shilem magitettsüsa akümer anungji, ajaki kü dang tai adoktsü mepishir,” ta ‘Baby’ hit ken atensang, arishi küm 21 tain Bieber-ia metetdaktsüogo.

Aji oda, Bieber-i shilem magitettsüsa akümba yong pa melena arishi küm 24 tain Sheeran-i kasa sentong nung shilem agitsü renemshir ta sentong tayongeri metetdaktsü.

“Ni Wembley nung shilem agibaji Britain nung tatemsüa shilem agir asütsü taoba mapang metetdaktsüogo. Ajisüaka, kü medemer Bieber-i 2015 Fusion Festival nung shilem magitettsüsa akümba yong ni pa melenzüka kasa sentong nung shilem agitsü nangzükogo,” ta ‘I See Fire’ hit ken atensang, Sheeran-i Twitter ajanga ashi.