Ed Sheeran kensep tasenba nung John Mayer-i shilem agi

London, January 08 (Agencies): “Kü indang kensep tasenba nung John Mayer-i shilem agi,” ta Ed Sheeran-i metetdaktsü.
2015 Grammys aser The Late Show nung Mayer den külemi shilem agia ken atensang, küm 25 tain Sheeran-i ashiba agi, ken mejema atener Mayer (39)-i Sheeran indang kensep tasenba nung guitar solo ka atem aser iba tenüng ‘Divide’ lir.
“Ni solo atenba ken ka nung guitar junga metemtet, anungji John Mayer-i junga temtettsü ta ni bilem. Aser ni pa dangi email asü aser yamaji pai kanga junga atem,” ta Sheeran-i osangbener dang shia liasü.
‘Thinking Out Loud’ ken ajanga nüngtugu akümsang Ed Sheeran-i kentenba nung ken anena ataba kisüng masü saka pai social media nunga küm ka kecha melemsai liasü.
“Ni kanga tongmelang nisung, anungji ni tongmelang mapang ka nung lir. Konang ta asüba ya, nai nü sasa lenmang bushia amshitsüla, aser ni kü mapa nung anena ataba ya iba konang ni koma amshitsüar memetetba ajanga lir anungji kanga jangratemtsübo masü. Ni tangbo battery recharge asüba ama kümogo aser kechiba ni kentenba nung temolung agütsür ta ni bilem, saka ni mejashir, kechiyong ni atenba ken nüburtemi kanga meimer aser aji kanga tajung lir,” ta Ed Sheeran-isa osangbener den jempidang shia liasü.