Eden Gardens nung 2016 World T20 final asayatsü: BCCI

Mumbai, July 21 (Agencies): Kolkata kübok Eden Gardens nung World Twenty20 (T20) asayamong final sangküm 2016 küm asayatsü renemba osang ka Board Of Control For Cricket In India (BCCI)-i tanü Mongolbar nü metetdaktsüogo.
Bengaluru, Chennai, Dharamshala, Mohali, Mumbai, Nagpur aser New Delhi nunger densemba yimti 7 nung tanüngba asayatem asayar külen küm 2 nung ken asayaba World T20 asayamong final Eden Gardens nung asayatsü lemtet.
“Sangküm March 11 nü nungi April 3 nü tashi asayatsü renemba T20 asayamong ayongtsü asoshi BCCI-i pelashishia agizükogo,” ta BCCI secretary, Anurag Thakur-i metetdaktsü.
“World T20 asayamong nung shilem agir aser terepranger ajungai mamatettsüsa ayonga agitsü nükjidong nung terenemshiba tulu agitsü tenzükogo,” ta pai ashi.
Sri Lanka aser Bangladesh na den külemi lungjemer 2011 küm World T20 asayamong ayongba sülen India-i iba asayamong indang takok maroka agizüka liasü.
BCCI Tir, Jagmohan Dalmiya-i aniba managing committee-i telok 16-i shilem agitsü renemba 2016 World T20 asayamong ketdang asütsü renema lir.
Bangladesh nung tesüsa, 2014 küm asayaba World T20 asayamong takok marok Sri Lanka teloki agizüka liasü.