Eden Hospital nung ‘Mission Smile’ angati camp akatsü

Dimapur, February 10 (TYO): Tang mezüng Nagaland nung February 27 nü nungi March 2, 2017 nü tashi Eden Medical Centre, Dimapur nung ‘Mission Smile’ kübok ‘Nagaland Cleft Surgery Mission’ angati medical camp ayongzüka katsütsü.
Tanü Eden Medical Centre, Dimapur nung osangbenertem senden ka nung jembidang Mission Smile, Guwahati Comprehensive Cleft Care Centre, MMC Hospital nungi Dipul Malakar-i, “Mission Smile ya 2003 küm tentet aser India nung nisung 30,000 dak tema ‘cleft’ operation agitsüogo. India nung iba mission ya ‘mission mode’ nung inyakdar, aser Northeast, India nung state kar nung mayimjemi lir,” ta metetdaktsü.
“Cleft patient temi chiyungdang aser o jembidang timtem ajangshir, iba den külemi tema teprangtsüa majung, aser item ama timtemji Cleft lip (tebang-mechi chimar aliba) aser Cleft palate (tebang-mechi nungi tsüngbangdong tashi chimar aliba) napronglai ajangshir,” ta paisa metetdaktsü.
Mission Smile kübok teyari agutsübatemji- angati cleft surgery agitsür, angati tendanga angati mozü agütsür, yimtsüng aser tezülen nungi arur- patient den shiranger anepalur ana nem angati transportation senotsü agütsür, tanendak aser chiyungtsü angati agütsür aser counseling angati agütsür, ta Malakar-isa metetdaktsü.
Surgery dak sentakba nung paisa, “Cleft lip operation atema arishi tajemba agi ita 6 bosa asütsüla aser temang touzükji tajemba agi seret 6 bosa asütsüla, aser iba dak temaba rogo ajaki iba surgery agitettsü. Ano Cleft palate atema arishi küm tajemba agi ita 12 bosa asütsüla, temang touzük tajemba agi seret 10 aser arishi timba agi küm 25 asütsüla,” ta metetdakttsü.
Nagaland nung Mission Smile atema Eden hospital den tezüngzüktep ka agiogo aser tang mezüngbuba camp nung tajemba agi nisung 50 bosa surgery agitsütsü nükjidong lir, ta paisa ashi.
Eden Hospital nung ayongzükba camp nung department balala nungi nisung 18-i akumba medical team ka Guwahati nungi arutsü.
Yimtsüngtem aser tezülen aliba nüburtem ajaki mission indang meteta/rajema alitsü atema state sorkar, osangbenertem, Arogo lenirtem aser lokti lenirtem teyari nüngdaker, ta paisa shisem.