EDHSS nung tesayur ana anentsüba dak sentakba nung rongrong manener

Mokokchung, July 23 (TYO): Mokokchung nung aliba Edith Douglas Higher Secondary School (EDHSS) nung school bangdaki tesayur ana mapa nungi anentsüba dak sentakba nung July 21 aser 22 anogo ananü class junga magiteti rongrong/pesaperong adokba osang ka ajanga jangjaogo.
Osang ajanga ashiba agi, EDHSS nung Mathematics tesayur ka aser English tesayur ka ta mapa nungi anentsüba dak sentakba nung July 21 nü EDHSS nung azünger kaketshir telungjemi school bangdak dang tezüluba ka nung tesayur anentsüba indang kuli meshi, aji mesüra school-i marutsü, ta shia takhangba ka agütsü. Aji saka, bangdak nungi telangzüba kecha mangu, ta angazüker.
Kaketshir o bangdak tsüngda pesaperong adokba osangji angashia EDHSS nung azünger tsürabur telungjemi iba kenoji angatetteptsü atema July 23, 2016 nü Salangtem Ward community hall nung anepdang 10:00 ako nung senden ka akatsü ayongtep, aji saka, school bangdak nungi shinga maru.
School bangdak nungi shinga maru nungji tsürabur telungjemisa ano nikongdang 2:00 ako nung kasa sendenji akatsü atema EDHSS principal kidangi tsüngdong oa shitiji agütsü, saka Principal-a maru aser bangdak nungi temeyongera shinga meyok, ta iba osangbeneri sentepa alir tsürabur kar den jembidang parnoki metetdaktsü.
Tanü iba senden nung tatsü talang aika jembiteper külen, tsürabur telungjemi school bangdak dang tezüluba nung takhangba kar agütsütsü lemtetogo aser iba tezüluba nung shia alibaji; mezüngbuba nung tang koba school bangdak ajanga tesayur ana anenja lir, tenaji July 25, 2016 (Hombarnü) nungi tanaben akhi ama pei mapa inyaktsü aniokang (reinstate süang).
Tanabuba nung, tsürabur telungjem den school administrator, principal, teaching staff-tem densema senden ka anogo asem tsüngda jateptsüla. Item takhangbatemji mataloktsüra tsürabur telungjemi mulungba ama inyaktsü aser timtem kar danga adokra ajakji school bangdak khuret asütsü, ta iba shiti nungjisa shia liasü.